ໃນຈຳນວນບັນດາເຍື່ອງອາຫານຂອງແຂວງລ້າງເຊີນນັ້ນ, ເບິ່ງຄືວ່າ ແຊບ ແລະ ມີຊື່ສຽງກວ່າໝູ່ແມ່ນໝູປິ່ນ. ໝູທັງໂຕປິ່ນເທິງເຕົາເຜົາ ດ້ວຍໜັງຖືກປ່ຽນ ເປັນສີເຫຼືອງ, ເບິ່ງເປັນໜ້າກິນທີ່ສຸດ. ແລະ ໃນປະຈຸບັນ, ເຍື່ອງອາຫານໝູປິ່ນໄດ້ກາຍເປັນອາຫານພິເສດຂອງທ້ອງຖິ່ນນີ້ ແລະ ໃນປະຈຸບັນ ກໍມີຂາຍຢູ່ຫຼາຍແຂວງ, ນະຄອນໃນທົ່ວປະເທດ.
ໝູປິ່ນ - ເຍື່ອງອາຫານພິເສດຢູ່ແຂວງລ້າງເຊີນ
|
ຢູ່ຕະຫຼາດຊຸມຊົນແຫ່ງໜຶ່ງຕັ້ງໃນທາງຮ່ອມ 107 ລິ້ງນາມ, ຮ່າໂນ້ຍ ມີຮ້ານຂາຍໝູປິ່ນລ້າງເຊີນຮ້ານໜຶ່ງທີ່ມີຊື່ສຽງ ແລະ ເປັນທີ່ຮູ້ຈັກກັນດີຂອງຫຼາຍໆຄົນ. ນັ້ນແມ່ນຮ້ານອາຫານໝູປິ່ນຂອງອ້າຍ ຫງວຽນວັນເຊີນ ຢູ່ບ້ານງ່າ, ເມືອງກາວໂລກ, ແຂວງລ້າງເຊີນ.
ເຖິງວ່າ ຫາກໍຂາຍຊີ້ນໝູປິ່ນຢູ່ຕະຫຼາດຊຸມຊົນນີ້ໄດ້ເກືອບ 2 ປີເທົ່ານັ້ນກໍຕາມ, ແຕ່ເວລາໃດຮ້ານຂາຍຊີ້ນໝູປິ່ນຂອງອ້າຍເຊີນ ກໍມີແຂກມາຊື້ເຕັມ. ດ້ວຍປະລິມານຊີ້ນໝູປິ່ນປະມານ 18 kg , ໃນເວລາພຽງ 2 ຊົ່ວໂມງຄືແຕ່ 9ໂມງຫາ 11 ໂມງເທົ່ານັ້ນ, ອ້າຍເຊີນກໍໄດ້ຂາຍເກືອບໝົດ. ອ້າຍ ຫງວຽນວັນເຊີນ ເປີດເຜີຍວ່າ :
“ ຢູ່ໝູ່ບ້ານຂອງຕົນ ກໍມີຫຼາຍຄົນຮູ້ຈັກວິທີປຸງແຕ່ງເຍື່ອງອາຫານໝູປິ່ນ, ແຕ່ສຳລັບຂ້າພະເຈົ້າແລ້ວ ກໍເຮັດເປັນປະຈຳ. ບັນດາຜູ້ອື່ນໆນັ້ນ, ເຄີຍເຮັດໝູປິ່ນໃນຍາມຈັດງານບຸນເທົ່ານັ້ນ. ເຮົາປະກອບອາຊີບຂາຍຊີ້ນໝູປິ່ນມາເປັນເວລາເກືອບ ສິບປີແລ້ວ, ຖ້າຫາກໄດ້ຍິນຄອບຄົວໃດຂາຍໝູ, ເຮົາກໍໄປຊື້ເລີຍ, ຖ້າບໍ່ດັ່ງນັ້ນ, ເຮົາກໍໄປຊອກຊື້ເອງ”
ຮອດເວລາ 11 ໂມງ 30 ນາທີ, ອ້າຍເຊີນກໍເລີ່ມເກັບມ້ຽນເຄື່ອງກັບເມືອບ້ານ ກະກຽມຊີ້ນໝູປິ່ນເພື່ອຂາຍໃນຕອນແລງ. ອ້າຍເຊີນໄດ້ເຊົ່າເຮືອນນ້ອຍໆຫຼັງໜຶ່ງຕັ້ງຢູ່ຫ່າງຈາກຕະຫຼາດປະມານເຄິ່ງ km , ເຮືອນຫຼັງນີ້ມີເນື້ອທີ່ປະມານ 15 m2 ພ້ອມກັບເຮືອນຄົວນ້ອຍຫ້ອງໜຶ່ງຖືກມຸງດ້ວຍດິນຂໍເພື່ອປິ່ນໝູ. ອ້າຍເຊີນ ໃຫ້ຮູ້ວ່າ ໝູ, ໃບມະໄຟຈີນ, ຖ່ານຟືນເພື່ອເຮັດໝູປິ່ນນັ້ນ ກໍລ້ວນແຕ່ຊື້ມາຈາກແຂວງລ້າງເຊີນ. ອ້າຍເຊີນ ເປີດເຜີຍວ່າ :
“ໃບມະໄຟຈີນ ແມ່ນໃບໄມ້ພິເສດຊະນິດໜຶ່ງທີ່ຂາດບໍ່ໄດ້ເມື່ອປຸງແຕ່ງເຍື່ອງອາຫານໝູປິ່ນ, ເປັດປິ່ນ. ໃບໄມ້ຊະນິດນີ້ຫອມທີ່ສຸດ. ຖ້າຫາກເຮັດໝູປິ່ນ, ແຕ່ບໍ່ມີ ໃບມະໄຟຈີນ ກໍບໍ່ສາມາດສ້າງລົດຊາດພິເສດໃຫ້ອາຫານເຍື່ອງນີ້ໄດ້ ”
ສຳລັບໝູ, ອ້າຍເຊີນກໍຈ້າງຂ້າແຕ່ມື້ກ່ອນ. ອ້າຍເຊີນເອົາໄມ້ໄຜ່ຍາວປະມານ 2-3 m ເພື່ອສຽບໃສ່ໝູທັງໂຕ. ກ່ອນທີ່ຈະນຳໝູໄປປິ່ນເທິງເຕົາເຜົາ, ອ້າຍເຊີນ ກໍເອົານ້ຳເຜີ້ງປົນກັບນ້ຳບໍລິສຸດໃຫ້ຈາງ, ແລ້ວກໍທາໃສ່ໜັງໝູ. ອ້າຍເຊີນ ເວົ້າວ່າ :
“ ຕ້ອງເອືອບເກືອ, ແປ້ງນົວ, ເຄື່ອງຫອມຢູ່ໃນທ້ອງຂອງໝູເສຍກ່ອນ, ຫຼັງຈາກຈາກນັ້ນ ຈຶ່ງຍັດໃບມະໄຟຈີນໃສ່ຕາມຫຼັງ. ສຸດທ້າຍແມ່ນຕ້ອງຫຍິບບ່ອນຍັດເຄື່ອງຫອມໃສ່ນັ້ນໃຫ້ແຈບ ເພື່ອເມື່ອປິ່ນໝູ, ນ້ຳຈະຖືກບໍ່ໄຫຼອອກນອກ ຈະເຮັດໃຫ້ໜັງໝູບໍ່ກອບ, ຕ້ອງຫຍິບໜັງເປັນ 2 ຊັ້ນ, ທັງທາງໃນ ແລະ ທາງນອກ ”
ເມື່ອປິ່ນໝູ, ອ້າຍເຊີນກໍນຳເອົານ້ຳມັນໝູທາໃສ່ໜັງໝູ ເພື່ອໃຫ້ໜັງບໍ່ຖືກແຫ້ງ ແລະ ໄໝ, ພ້ອມກັນນັ້ນ ລາວກໍໃຊ້ເຫຼັກດິ້ວທີ່ມີປາຍແຫຼມ ຄ່ອຍສອຍໃສ່ໜັງເພື່ອຫຼຸດຜ່ອນນ້ຳມັນຂອງໝູລົງ ແລະ ກໍຊ່ວຍໃຫ້ໜັງໝູບໍ່ໂພງຂຶ້ນ. ພາຍຫຼັງປິ່ນໝູເທິງເຕົາເຜົາເປັນເວລາ 3 ຊົ່ວໂມງ, ໝູປິ່ນລ້າງເຊີນ ຂອງ ອ້າຍເຊີນໄດ້ກຽມພ້ອມນຳໄປຂາຍຢູ່ຕະຫຼາດຍາມຕອນແລງ.
ດ້ວຍລາຄາ 130.000 ດົງ /kg, ຜູ້ບໍລິໂພກທັງຫຼາຍຈະໄດ້ຊິມລົດຊາດພິເສດຂອງໝູປິ່ນລ້າງເຊີນ, ດ້ວຍໜັງກອບເຫຼືອງ, ລົດຫວານຂອງຊີ້ນພ້ອມກັບລົດຫອມຂອງ ໃບມະໄຟຈີນ, ລົດເຂັ້ມຂົ້ນຂອງນ້ຳແຈວ ຈະເຮັດໃຫ້ຜູ້ບໍລິໂພກບໍ່ອາດຫຼົງລືມເຍື່ອງອາຫານທ້ອງຖິ່ນພິເສດນີ້.
ທ່ານຜູ້ຟັງທີ່ເຄົາລົບ! ຖ້າຫາກພວກເພື່ອນຢາກເຮັດໝູປິ່ນໃຫ້ຄອບຄົວກິນ, ພວກເພື່ອນຕ້ອງກະກຽມວັດຖຸດິບດັ່ງນີ້:
- ຊີ້ໝູ 3 ຊັ້ນ : 3 kg
- ໃບມະໄຟຈີນ : 200 ກຣາມ
- ຖ່ານຟືນ : 3 kg ພ້ອມກັບເກືອ, ແປ້ງນົວ, ເຄື່ອງຫອມ, ນ້ຳເຜີ້ງ ແລະ ໄມ້ໄຜ່ເພື່ອມັດໝູ
- ວິທີປຸງແຕ່ງ :
ທຳອິດຕ້ອງລ້າງຊີ້ນ ແລະ ແຖຂົນໜັງໝູໃຫ້ສະອາດ, ແລ້ວກໍເອືອບກັບເກືອ, ແປ້ງນົວ, ເຄື່ອງຫອມ.
ເອົາໃບມະໄຟຈີນຍັດໃສ່ດ້ານໃນ, ແລ້ວກໍເອົາເຫຼັກລວດມັດຊີ້ນ 3 ຊັ້ນໃສ່ໄມ້ໄຜ່.
ຫຼັງຈາກນັ້ນ, ເອົານ້ຳເຜີ້ງປົນກັບນ້ຳບໍລິສຸດໃຫ້ຈາງ ເພື່ອທາໃສ່ໜັງໝູ.
ເມື່ອປິ່ນໝູ, ຢາລືມເອົານ້ຳມັນໝູທາໃສ່ໜັງໝູ ເພື່ອໃຫ້ໜັງບໍ່ຖືກແຫ້ງ ແລະ ໄໝ, ພ້ອມກັນນັ້ນ ກໍໃຊ້ເຫຼັກດິ້ວທີ່ມີປາຍແຫຼມ ຄ່ອຍສອຍໃສ່ໜັງເພື່ອຫຼຸດຜ່ອນນ້ຳມັນຂອງໝູລົງ ແລະ ກໍຊ່ວຍໃຫ້ໜັງໝູບໍ່ໂພງຂຶ້ນ. ຫວັງວ່າພວກເພື່ອນຈະເຮັດກິນແຊບ.