ສຳລັບຊາວຫວຽດນາມແລ້ວ, ປາເອືອບເຂົ້າຂົ້ວແມ່ນເຍື່ອງອາຫານມີຢູ່ທົ່ວໄປໃນຫຼາຍທ້ອງຖິ່ນ, ພິເສດແມ່ນຢູ່ເຂດພູດອຍທາງພາກເໜືອຫວຽດນາມ. ແຕ່ກໍຍັງມີແຫ່ງໜຶ່ງຊຶ່ງເຍື່ອງອາຫານ ປາເອືອບເຂົ້າຂົ້ວໄດ້ກາຍເປັນເຄື່ອງໝາຍການຄ້າທີ່ມີຊື່ສຽງ, ນັ້ນແມ່ນ ປາເອືອບເຂົ້າຂົ້ວໃນໝູ່ບ້ານວັນກ້ວານ, ເມືອງເລີບແຈກ, ແຂວງວິ້ງຟຸກ.
ເຍື່ອງອາຫານ ປາເອືອບເຂົ້າຂົ້ວ
|
ເວລາ 9 ໂມງເຊົ້າ, ໃຕ້ແສງແດດຮ້ອນເອົ້າໃນຍາມລະດູແລ້ງ. ຈາກຫົວບ້ານ, ພວກຂ້າພະເຈົ້າກໍໄດ້ຍິນສຽງເນື່ອງນັນດັງມາຈາກຫຼັງເຮືອນຂອງລຸງ ຮ່ວາງວັນຮຸ່ງພ້ອມກັບລູກຊາຍໃຫຍ່ 2 ລູກຂອງລຸງ ພວມເວົ້ານົວຫົວມ່ວນໃນຂະນະທີ່ພວມຫາປາໃນສະກວ້າງເກືອບ 500 ຕາແມັດເພື່ອກະກຽມເຮັດປາເອືອບເຂົ້າຂົ້ວ. ພາຍຫຼັງແກ້ປາຈາກແຫ, ຊຶ່ງສ່ວນຫຼາຍແມ່ນປາໄນ, ປາເຂັງ, ປາຄໍ່, ປານິນ. ປາແຕ່ລະໂຕຖືກລຸງຮຸ່ງຄົວ ແລະ ເຊາະເກັດ, ແລ້ວລ້າງໃຫ້ສະອາດ. ທັງຄົວປາ, ລຸງຮຸ່ງທັງອະທິບາຍວ່າ :
“ ເພື່ອໃຫ້ມີເຍື່ອງອາຫານ ປາເອືອບເຂົ້າຂົ້ວທີ່ແຊບນົວ, ແມ່ນຕ້ອງຜ່ານຫຼາຍຂັ້ນຕອນ, ຈາກຂອດເລືອກເອົາປາຕະຫຼອດຮອດຂອດປຸງແຕ່ງ. ປາຊະນິດໃດກໍສາມາດປຸງແຕ່ງໄດ້, ແຕ່ແຊບກວ່າໝູ່ແມ່ນປານິນຫຼືປາຄໍ່, ມີນ້ຳໜັກແຕ່ເຄິ່ງໂລຂຶ້ນໄປ, ຕ້ອງເລືອກເອົາປາສົດໆຈຶ່ງແຊບ ”
ລຸງຮຸ່ງໄດ້ຄົວປາ, ເຊາະເກັດ, ເອົາໄສ້ອອກ ແລະ ລ້າງໃຫ້ສະອາດ, ຫຼັງຈາກນັ້ນປະໃຫ້ແຫ້ງປະມານ 10 ຫາ 15 ນາທີ. ລຸງໄດ້ເອົາເກືອຍັດໃສ່ທ້ອງປາ, ແລ້ວເອົາປາໃສ່ໄຫ, ເມື່ອວາງປາກໍຕ້ອງເອົາເກືອປະສົມນຳອີກ, ປາຊັ້ນໜຶ່ງກໍຕ້ອງໂຮຍເກືອຊັ້ນໜຶ່ງ. ຫຼັງຈາກນັ້ນ, ລຸງຮຸ່ງເອົາແຜ່ນຕອກໄມ້ໄຜ່ວາງເທິ່ງ ແລະ ເອົາຫີນກ້ອນໃຫຍ່ຊຳຝາມືວາງເໜືອສຸດ. ແລ້ວປະໄວ້ແຕ່ 5-7 ວັນ.
ເພື່ອປຸງແຕ່ງ ເຍື່ອງອາຫານ ປາເອືອບເຂົ້າຂົ້ວ ໃຫ້ແຊບນັ້ນ, ຂອດສຳຄັນກວ່າໝູ່ແມ່ນຂອດເຮັດເຂົ້າຂົ້ວ, ປ້າຈຸງ ຜູ້ເປັນເມຍຂອງລຸງ ຮຸ່ງແບ່ງປັນວ່າ :
“ ສຳລັບເຍື່ອງອາຫານ ປາເອືອບເຂົ້າຂົ້ວນັ້ນ, ເຂົ້າຂົ້ວກໍແມ່ນໜຶ່ງໃນບັນດາວັດຖຸດິບທີ່ສຳຄັນ ແລະ ຂາດບໍ່ໄດ້ . ເມື່ອຂົ້ວເຂົ້າ, ຕ້ອງຂົ້ວຈົນເຫຼືອງ, ແລ້ວນຳໄປຕຳໃຫ້ມຸ່ນ, ບໍ່ຄວນຕຳໃຫ້ແຫຼກ ເພາະມັນຈະຕິດໃສ່ປາ”
ປ້າຈຸງ ແລະ ລຸງຮຸ່ງຕັກເອົາປາເອືອບເກືອໃນໄຫເປັນເວລາ 7 ວັນ, ແລ້ວປະໃຫ້ແຫ້ງ. ຫຼັງຈາກນັ້ນ, ລຸງຮຸ່ງໄດ້ເອົາເຂົ້າຂົ້ວຍັດໃສ່ທ້ອງປາ, ແລ້ວເອົາປາໃສ່ໄຫ, ເມື່ອວາງປາກໍຕ້ອງເອົາເຂົ້າຂົ້ວປະສົມນຳອີກ, ປາຊັ້ນໜຶ່ງກໍຕ້ອງໂຮຍເຂົ້າຂົ້ວຊັ້ນໜຶ່ງ.ຫຼັງຈາກນັ້ນ,ລຸງຮຸ່ງເອົາແຜ່ນໄມ້ໄຜ່ຕອກວາງເທິ່ງ. ລຸງຮຸ່ງໃຫ້ຮູ້ວ່າ :
“ ພາຍຫຼັງ 3 ເດືອນ ກໍສາມາດເອົາປາມາກິນໄດ້, ແຕ່ໃນຈຸດເວລານີ້ ແມ່ນຍັງບໍ່ທັນແຊບເທື່ອ, ຕ້ອງໃຊ້ເວລາ 6 ເດືອນ ຂຶ້ນໄປຈຶ່ງແຊບ ແລະ ຍິ່ງໄວ້ດົນກໍຍິ່ງແຊບ. ຈຸດທີ່ແຕກຕ່າງກັບອາຫານປີ້ງປາ ແລະ ປາຈືນແມ່ນຢູ່ບ່ອນວ່າ : ຊີ້ນປາເອືອບເຂົ້າຂົ້ວ ແມ່ນອ່ອນ ແລະ ໜຽວ, ບໍ່ແຫຼວຄືຊີ້ນປາປີ້ງຫຼືປາຈືນ. ເມື່ອກິນກໍມີກິ່ນຫອມ, ບໍ່ແຫ້ງ ແລະ ບໍ່ເຄັມຄືປາທະເລ, ອັນໄດ້ດຶງດູດຄວາມນິຍົມບໍລິໂພກຂອງຫຼາຍຄົນ ”
ປາເອືອບເຂົ້າຂົ້ວອາດຈະກິນແບບພັນກັບເຂົ້າຂຽບຫຼືເອົາໄປຈືນກິນກັບເຂົ້າ… ແຕ່ກິນແຊບທີ່ສຸດແມ່ນ ນຳໄປປີ້ງ, ເມື່ອກິນຈະມີລົດເຂັ້ມຂອງເກືອ ແລະ ລົດຫອມຂອງເຂົ້າຂົ້ວ.
ສະເລ່ຍໃນແຕ່ລະອາທິດ, ຄອບຄົວລຸງຮຸ່ງຂາຍປາອອກສູ່ຕະຫຼາດໄດ້ແຕ່ 2-3 ໄຫ. ສຳລັບລາຄາ ແມ່ນຂຶ້ນກັບປາແຕ່ລະຊະນິດ. ຄືປາໄນມີລາຄາແຕ່ 200-220.000/kg, ປານິນ ມີລາຄາແຕ່ 110-120.000/kg. ປາເອືອບເຂົ້າຂົ້ວຂອງລຸງຮຸ່ງແມ່ນຖືກພັດທະຄານຫຼາຍແຫ່ງຢູ່ນະຄອນ ວິ້ງອຽນ, ແຂວງວິງຟຸກສັ່ງຊື້. ເຍື່ອງອາຫານນີ້ ສາມາດນຳລາຍໄດ້ມາໃຫ້ຄອບຄົວຂອງລຸງແຕ່ 60-70 ລ້ານດົງ/ປີ.