ຕາມປົກກະຕິແລ້ວ ປູ່ຍ່າຕາຍາຍ ເຄີຍມີຄຳເວົ້າທີ່ວ່າ “ພິທີບູຊາ, ບຸນເຕັດຕະຫຼອດປີ, ຍັງບໍ່ປຽບປານໄດ້ການບູຊາວັນເພັງເດືອນຈຽງ ”. ສະນັ້ນ, ແຕ່ລະຄອບຄົວກໍ່ລ້ວນແຕ່ກະກຽມພາເຂົ້າໃຫ້ເໝາະສົມເພື່ອບູຊາປູ່ຍ່າຕາຍາຍ, ບູຊາບັນພະບູລຸດໃນວັນເພັງເດືອນຈຽງ ເພື່ອພາວະນາຂໍໃຫ້ປະສົບແຕ່ສິ່ງທີ່ດີງາມ, ຄວາມສະຫງົບສຸກໃນປີໃໝ່. ພິເສດໃນພາເຂົ້ານັ້ນແມ່ນ ບໍ່ອາດຂາດໄດ້ເຍື່ອງເຂົ້າໜຽວໝາກເຂົ້າ, ໝາກຖົ່ວຂຽວ.
 |
ເວລາປະມານ 6 ໂມງເຊົ້າຂອງວັນຕົ້ນລະດູບານໃໝ່, ໂດຍລຽບຕາມແຄມຝັ່ງແມ່ນ້ຳແດງ ພວກຂ້າພະເຈົ້າໄດ້ໄປເຖິງ ບ້ານຕື້ຢໍ ຂຶ້ນກັບແຂວງອຽນບ໋າຍ, ຫ່າງຈາກໃຈກາງນະຄອນຫຼວງຮ່າໂນ້ຍປະມານ 200 ກິໂລແມັດ. ນັບແຕ່ຫົວທາງຮ່ອມ, ພວກຂ້າພະເຈົ້າໄດ້ຍິນສຽງເນືອງນັນດັງອອກມາຈາກເຮືອນປ້າກຽວ. ເມື່ອເຂົ້າໄປເບິ່ງ, ພວກຂ້າພະເຈົ້າຈຶ່ງເຫັນປ້າກຽວພ້ອມກັບລູກໃພ້ພວມລົມກັນ, ຍີ້ມຫົວນຳກັນຢ່າງຄຶກຄັກຢູ່ຂ້າງນ້ຳສ້າງ ຕິດກັບເດີ່ນປູດິນຈີ່ ກວ້າງປະມານ 12 ຕາແມັດ, ທີ່ພວມຮ່ອນເຂົ້າສານໜຽວ ກະກຽມເຮັດເຍື່ອງເຂົ້າໜຽວ ເພື່ອບູຊາປູ່ຍ່າຕາຍາຍ, ບູຊາບັນພະບູລຸດໃນວັນເພັງເດືອນຈຽງ.
ປ້າກຽວປີນີ້ມີອາຍຸ 70 ປີແລ້ວ ແຕ່ເບິ່ງຄືວ່າ ປ້າຍັງມີຄວາມຄ່ອງແຄ້ວວ່ອງໄວ ແລະ ສະຫຼາດຢູ່, ປ້າແມ່ນລູກໃພ້ກົກຂອງຂອງຄົວທີ່ມີມູນເຊື້ອເຮັດເຂົ້າໜຽວໝາກເຂົ້າ. ປະຈຸບັນປ້າກໍ່ມີອາຍຸສູງແລ້ວ ສະນັ້ນຈຶ່ງໄດ້ແນະນຳໃຫ້ລູກໃພ້ ເພື່ອສືບຕໍ່ຮັກສາ ແລະ ເສີມຂະຫຍາຍມູນເຊື້ອຂອງຄອບຄົວນີ້ໄວ້. ປ້າທັງຮ່ອນເຂົ້າ ທັງໃຫ້ຮູ້ວ່າ :
“ ເພື່ອໃຫ້ໄດ້ເຍື່ອງເຂົ້າໜຽວໝາກເຂົ້າ, ເຂົ້າໜຽວໝາກຖົ່ວຂຽວທີ່ແຊບ ແລະ ງາມຕາເພື່ອບູຊາປູ່ຍ່າຕາຍາຍ, ບູຊາບັນພະບູລຸດນັ້ນ ຕ້ອງຜ່ານຫຼາຍຂັ້ນຕອນຢ່າງພິຖີພິຖັນ. ກ່ອນອື່ນໝົດແມ່ນຕ້ອງເລືອກເອົາເຂົ້າສານໜຽວຊະນິດທີ່ແຊບ, ເມັດສະໝ່ຳສະເໜີ, ແຂງດີ, ເມື່ອຫຍ້ຳລອງເບິ່ງຈະມີລົດຊາດຫວານແບບທຳມະຊາດ, ມີກິ່ນຫອມເຂົ້າໃໝ່. ຫຼັງຈາກນັ້ນ ຮ່ອນເຂົ້າສານໃຫ້ສະອາດ ແລ້ວນຳໄປມ່າເປັນເວລາໜຶ່ງຄືນ ເພື່ອໃຫ້ເຂົ້າອ່ອນ, ນຸ້ມ, ຫອມ ແລະ ແຊບ”
ໃນຂະນະທີ່ເຂົ້າໄດ້ຊາວອອກເພື່ອໃຫ້ສະເດັດນ້ຳນັ້ນ, ປ້າກຽວກໍ່ເອົາໝາກເຂົ້າທີ່ສຸກແລ້ວ ເຊິ່ງມີນ້ຳໜັກປະມານ 6 – 7 ຂີດ ມາຜ່າຕາມລວງຂວາງຂອງມັນ, ໃຊ້ບ່ວງຂູດເອົານວນ ແລະ ແກ່ນຂອງມັນໃສ່ຖ້ວຍໃຫຍ່, ແລ້ວປ້າກໍ່ເອົາເຫຼົ້າຂາວໃສ່ຕື່ມອີກ 50 ມິລີລິດ, ໃຊ້ມືບີບໝາກເຂົ້າກັບເຫຼົ້າໃຫ້ເຂົ້າກັນ ເພື່ອໃຫ້ໝາກເຂົ້າແລກແຫຼວດີ ແລະ ມີສີ. ຫຼັງຈາກນັ້ນ ປະມານ 5 ນາທີ ປ້າຈຶ່ງເອົາມາຄົນໃສ່ກັບເຂົ້າສານໜຽວໃຫ້ສະໝ່ຳສະເໝີ ຈົນຮອດເວລາທີ່ເຂົ້າສານແຕ່ລະເມັດປ່ຽນສີມາເປັນສີແດງສົ້ມ ແລ້ວຈຶ່ງນຳໄປໜຶ້ງ. ເມື່ອເຂົ້າສຸກ ປ້າເອົາອອກມາວີ, ເອົານ້ຳຕານມາຄົນໃສ່ຕື່ມ 3-4 ບ່ວງ. ປ້າເວົ້າວ່າ ເພື່ອເຮັດໄດ້ເຂົ້າໜຽວໝາກເຂົ້າທີ່ແຊບ ບັນດາວັດຖຸດິບສົດທີ່ເອົາມາເຮັດນັ້ນ ລ້ວນແຕ່ສຳຄັນທີ່ສຸດ ແຕ່ເພື່ອໃຫ້ໄດ້ສີທີ່ສົດສວຍງາມຕາ ແລະ ມີກິ່ນຫອມແບບທຳມະຊາດນັ້ນ ການເລືອກໝາກເຂົ້າກໍ່ສຳຄັນ.
“ ເລືອກໝາກເຂົ້າ ເພື່ອເຮັດເຂົ້າໜຽວໝາກເຂົ້າໃນໂອກາດງານບຸນວັນເພັງ ພວກເຮົາຄວນເລືອກເອົາໝາກທີ່ບໍ່ນູມ, ມີສີແດງສົດໃສ, ຂວັ້ນໃຫຍ່ນວນຈຶ່ງຫຼາຍ, ໜາມນ້ອຍສະເໝີ ແລະ ຫ່າງກັນ, ເມື່ອຈັບຮູ້ສຶກວ່າໜັກມື. ສິ່ງພິເສດແມ່ນ ໝາກເຂົ້າອາດຈະປະໄວ້ໄດ້ດົນເປັນເດືອນ ”
ໃນຂະນະທີ່ປ້າກຽວພວມໜຶ້ງເຂົ້າຢູ່ນັ້ນ, ເອື້ອຍຫງາ-ລູກໃພ້ຂອງປ້າກໍ່ໜຶ້ງໝາກຖົ່ວຂຽວ ເພື່ອເອົາມາປົນໃສ່ກັບເຂົ້າໜຽວໝາກເຂົ້າ, ອັນໄດ້ສ້າງລົດຊາດທີ່ຫວານແຊບໃຫ້ເຂົ້າໜຽວ. ເມື່ອໜຶ້ງໝາກຖົ່ວຂຽວສຸກແລ້ວ, ເອື້ອຍກໍ່ເອົາມາບົດໃຫ້ມຸ່ນ. ຫຼັງຈາກນັ້ນເອື້ອຍເອົາເກືອໃສ່ໜ້ອຍໜຶ່ງແລ້ວກໍ່ຄົນໃຫ້ທົ່ວ. ສຸດທ້າຍ, ເອື້ອຍເອົາໝາກຖົ່ວຂຽວທີ່ບົດແລ້ວນັ້ນໄປຂົ້ວ ເຮັດໄຟອ່ອນໆຈົນນ້ຳຕານເປື່ອຍ ແລະໝາກຖົ່ວຕິດເຂົ້າກັນຄືນ. ເອື້ອຍຫງາແບ່ງປັນວ່າ:
“ໝາກຖົ່ວຂຽວ ພາຍຫຼັງທີ່ມ່າໄດ້ 3-4 ຊົ່ວໂມງແລ້ວ,ຊາວອອກປະໄວ້ໃຫ້ສະເດັດນ້ຳ. ຫຼັງຈາກນັ້ນຈຶ່ງເອົາໄປໜຶ້ງປະມານ 20-25 ນາທີ ແລ້ວເອົາມາບົດໃຫ້ແລກ. ເຮັດເຂົ້າໜຽວໝາກເຂົ້າໝາກຖົ່ວຂຽວ ຢາກໃຫ້ແຊບ ແລະ ມີກິ່ນຫອມນັ້ນ ຕ້ອງເລືອກເອົາໝາກຖົ່ວຂຽວໃໝ່, ເມັດນ້ອຍສະເໝີກັນ, ເພາະວ່າໝາກຖົ່ວຊະນິດນີ້ ທັງຜົງ ແລະ ທັງມີກິ່ນຫອມ ”
ເພື່ອໃຫ້ໄດ້ເຂົ້າໜຽວທີ່ມີຮູບຮ່າງງາມຕາ , ປ້າກຽວໃຊ້ກອບໄມ້ຮູບຫົກລ່ຽມ, ທາງໜ້າໄດ້ຄວັດຕົວໜັງສືໃສ່ ແລະ ອາດຈະແກະອອກກໍ່ໄດ້. ປ້າເອົາເຂົ້າໜຽວໃສ່ຊັ້ນທີໜຶ່ງ, ແລ້ວຈຶ່ງເອົາໝາກຖົ່ວຂຽວໃສ່ເຄິ່ງກາງ, ສຸດທ້າຍກໍ່ເອົາເຂົ້າໜຽວໃສ່ເທິງອີກຊັ້ນໜຶ່ງ, ໃຊ້ບ່ວງເນັ່ນລົງໃຫ້ແໜ້ນແລ້ວຈຶ່ງເອົາອອກຈາກກອບ. ຍ້ອນວ່າເຂົ້ານຸ້ມ, ສະນັ້ນໃນເວລາເອົາໃສ່ກອບ,ມັນຈຶ່ງຕິດໄດ້ງ່າຍທີ່ສຸດ ເຮັດໃຫ້ເຂົ້າໜຽວບໍ່ງາມ, ສະນັ້ນປ້າກຽວຈຶ່ງເຮັດໃຫ້ຖືກຕ້ອງຕາມເຄັດລັບທີ່ພໍ່ແມ່ປະໄວ້ໃຫ້:
“ເພື່ອບໍ່ໃຫ້ເຂົ້າໜຽວຕິດໃສ່ກອບ ( ໂດຍສະເພາະແມ່ນກອບທີ່ເຮັດດ້ວຍໄມ້ ), ຕ້ອງທານ້ຳມັນພືດໃສ່ທາງໜ້າກອບ, ເຮັດຄືແນວນັ້ນ ຮັບປະກັນວ່າເຂົ້າຈະບໍ່ເຫຼື້ອມ, ແລະ ມີຮູບຮ່າງສວຍງາມ. ຫຼັງຈາກນັ້ນ ເອົາໝາກງາໂຮຍໃສ່ໜ້ອຍໜຶ່ງກ່ອນທີ່ຈະເອົາເຂົ້າ ແລະ ໝາກຖົ່ວຂຽວໃສ່, ເຮັດຄືແນວນັ້ນເຂົ້າໜຽວໝາກເຂົ້າ ແລະ ໝາກຖົ່ວຂຽວຈຶ່ງມີກິ່ນຫອມຫຼາຍກວ່າ ”
ການປະສົມປະສານກັນລະຫວ່າງໝາກຖົ່ວຂຽວ, ໝາກເຂົ້າ ແລະ ເຂົ້າໜຽວ ໄດ້ສ້າງເປັນລົດຊາດທີ່ຈັບອົກຈັບໃຈທີ່ສຸດ. ເມື່ອເວລາທີ່ພວກເຮົາຊີມເບິ່ງ ຈະຮູ້ສຶກໄດ້ກິ່ນຫອມທີ່ເປັນເອກະລັກສະເພາະຂອງໝາກເຂົ້າ ປົນກັບກິ່ນຫອມຂອງໝາກງາ, ຄວາມຜົງຂອງໝາກຖົ່ວຂຽວ, ຄວາມນຸ້ມຫອມຂອງເຂົ້າໜຽວ ໄດ້ປະສົມປະສານເຂົ້າກັນ ເຊິ່ງມັນໄດ້ສ້າງຄວາມຮູ້ສຶກໃຫ້ພວກເຮົາມີຄວາມອົບອຸ່ນໃນວັນຕົ້ນລະດູບານໃໝ່, ແລະ ດ້ວຍຄວາມຄິດທີ່ວ່າ ໃຜໄດ້ຮັບປະທານເຍື່ອງອາຫານນີ້ແລ້ວ ກໍ່ຈະພົບແຕ່ຄວາມໂຊກດີ. ແຕ່ວ່າຄວາມຈັບອົກຈັບໃຈທີ່ສຸດຂອງຈານເຂົ້າໜຽວໝາກເຂົ້າ, ໝາກຖົ່ວຂຽວ ແມ່ນຢູ່ບ່ອນວ່າ: ສີແດງຂອງໝາກເຂົ້າ ໄດ້ກົມກືນເຂົ້າກັບສີເຫຼືອງຂອງໝາກຖົ່ວຂຽວ ເຊິ່ງໄດ້ນຳມາໃຫ້ຊາວຫວຽດນາມ ຄວາມໂຊກດີ, ຄວາມຜາສຸກ ແລະ ຄວາມວັດທະນາຖາວອນ .
ທ່ານຜູ້ຟັງທີ່ເຄົາລົບ! ຖ້າຫາກພວກເພື່ອນຢາກເຮັດເຂົ້າໜຽວໝາກເຂົ້າ, ໝາກຖົ່ວຂຽວ, ພວກເພື່ອນຕ້ອງກະກຽມວັດຖຸດິບດັ່ງນີ້:
- ເຂົ້າສານໜຽວ: 500 ກຣາມ
- ໝາກຖົ່ວຂຽວ: 150 ກຣາມ
- ໝາກເຂົ້າ: 1 ໜ່ວຍ(ປະມານແຕ່ 500-700 ກຣາມ)
- ເກືອ, ນ້ຳມັນພືດ, ເຫຼົ້າຂາວ…
ສຳລັບວິທີເຮັດ, ຂໍໃຫ້ບັນດາທ່ານຕິດຕາມເນື້ອໃນທີ່ໄດ້ກ່າວມາຂ້າງເທິ່ງ. ຫວັງວ່າພວກເພື່ອນຈະເຮັດກິນແຊບ.