(vovworld) - ຍຳໝາກຫຸ່ງໃສ່ຊີ້ນງົວແຫ້ງແມ່ນເຍື່ອງອາຫານວ່າງໃຜໆກໍ່ມັກກິນ. ວັດຖຸດິບທີ່ນຳມາປຸງແຕ່ງແມ່ນຫາຊື້ໄດ້ຢ່າງສະດວກຢູ່ຕາມທ້ອງຕະຫຼາດ ແລະ ວິທີການປຸງແຕ່ງກໍ່ງ່າຍດາຍ ແຕ່ວ່າເຮັດແນວໃດເພື່ອໃຫ້ມີລົດຊາດທີ່ແຊບຊ້ອຍນັ້ນພັດບໍ່ແມ່ນເລື່ອງງ່າຍ. ແຕ່ວ່າໃນແຕ່ລະມື້, ເບິ່ງຄືວ່າເກືອບທຸກຄຸ້ມຖະໜົນນ້ອຍຂອງຮ່າໂນ້ຍພັດຍັງມີຜູ້ຂາຍເຍື່ອງອາຫານຍຳໝາກຫຸ່ງໃສ່ຊີ້ນງົວແຫ້ງຢູ່. ແຕ່ລະຮ້ານຂາຍນັ້ນກໍ່ມີເຄັດລັບສະເພາະເພື່ອ ດຶງດູດລູກຄ້າໃນລາຍການອາຫານຫວຽດນາມພາກນີ້, ນັກຂ່າວຢ້ຽວຮົ່ງເຊີນທ່ານຜູ້ຟັງໄປຄົ້ນຫາເຍື່ອງອາຫານວ່າງດັ່ງກ່າວ.
ສຽງຕັດມີດຕັດດັງແກັບໆ ນັ້ນແມ່ນສຽງຈ່າວຂາຍຍຳໝາກຫຸ່ງທີ່ຄຸ້ນເຄີຍຂອງລຸງຈີ໋ນ, ຄົນເລາະຂາຍເຍື່ອງອາຫານວ່າງ ທີ່ມີຊື່ວ່າ: ຍຳໝາກຫຸ່ງໃສ່ຊີ້ນງົວແຫ້ງ ແລະ ສຽງຈ່າວຂາຍນີ້ ກໍ່ເປັນສຽງທີ່ຄຸ້ນເຄີຍກັບປະຊາຊົນທີ່ຢູ່ໃນທຸກຄຸ້ມຂອງຕາແສງແທງຍ່ານ, ເມືອງຫາຍບາຈຶງ. ລຸງຈີ໋ນມີອາຍຸຫຼາຍແລ້ວແຕ່ວ່າທຸກໆມື້ລຸງກໍ່ຍັງຂີ່ລົດຖີບໄປເລາະຂາຍເຍື່ອງອາຫານນີ້ຢູ່ ຕາມຄຸ້ມຖະໜົມ. ລຸງຈິ໋ນໃຫ້ຮູ້ວ່າ :
“ສະເລ່ຍແລ້ວຂ້າພະເຈົ້າຂາຍໄດ້ 40 ຈານຕໍ່ມື້ ອີງຕາມແຕ່ລະລະດູເຊິ່ງຕົນເອງຂາຍໜ້ອຍ ຫຼື ຂາຍຫຼາຍ. ຕາມປົກກະຕິແລ້ວ ລະດູຮ້ອນແມ່ນຈະຂາຍໄດ້ຫຼາຍກວ່າທົບເຄິ່ງ ຫຼື ປະມານ 60 ຈານ, ມີບາງມື້ແມ່ນຫຼາຍກວ່ານັ້ນ. ຕອນເຊົ້າແມ່ນບໍ່ມີໃຜກິນອາຫານເຍື່ອງນີ້ ສະນັ້ນຈຶ່ງຂາຍພຽງແຕ່ຕອນທ່ຽງຈົນວ່າຮອດເວລາໄດ້ຂາຍໝົດ. ແຕ່ລະຈານແມ່ນຂາຍ 20.000 ດົ່ງ, ແລະ ມີກຳໄລຢູ່ປະມານ 4.000 – 5.000 ດົ່ງ”.
 |
ແຕ່ 5-6 ປີມານີ້, ມື້ໃດກໍເຊັ່ນດຽວກັນ, ນັບແຕ່ເວລາ 13 ໂມງເຄິ່ງລຸງຈິ໋ນກໍໄປເລາະຂາຍເຍື່ອງອາຫານວ່າງດ້ວຍລົດຖີບເກົ່າ, ເຫຼັກເຂົ້າຂີ້ໝ້ຽງເປັນສວ່ນໆ, ທາງຫຼັງແມ່ນຕ່າງຕູ້ຂາຍເຄື່ອງທີ່ມີສອງຊັ້ນຖືກເຮັດດ້ວຍແກ້ວເປັນຮູບສີ່ແຈສາກ, ຍາວ 50 cm ແລະກວ້າງ 30 cm. ຊັ້ນເທິງຂອງຕູ້ແມ່ນບັນຈຸໝາກຫຸ່ງ ແລະ ກາຣົດ ທີ່ຂູດເປັນເສັ້ນ ແລະ ຜັກຫອມ. ສ່ວນຊັ້ນລຸ່ມແມ່ນບັນຈຸກັບໂຟມທີ່ເຕັມໄປດ້ວຍຊີ້ນງົວແຫ້ງ, ໝາກຖົ່ວດິນຂົ້ວ. ສ່ວນຢູ່ກະຕ່າລົດຖີບນັ້ນແມ່ນບັນຈຸນ້ຳຍຳສອງສາມຕຸກເຊິ່ງໄດ້ຮັບການປຸງແຕ່ງສຳເລັດແລ້ວ. ລຸງທັງຖີບລົດຊ້າໆທັງຈັບມີດຕັດ ຕັດໃຫ້ມີສຽງດັງແກັບແກັບອອກມາ. ສຽງຕັດມີດຕັດດັງບໍ່ແຮງ ແລະ ກໍ່ບໍ່ຄ່ອຍ ແຕ່ກໍ່ພຽງພໍກັບການເຊື້ອເຊີນເອີ້ນແຂກມາຊື້ອາຫານວ່າງໄດ້.
ແຂກຊື້ຍຳໝາກຫຸ່ງໃສ່ຊີ້ນງົວແຫ້ງ ແມ່ນນາງຮວາຊຶ່ງແມ່ນລູກຄ້າທີ່ລື້ງເຄີຍ, ລຸງຈີ໋ນຈອດລົດ, ເປີດຕູ້ແກ້ວອອກແລະກໍ່ເຮັດເປັນໂຕະຂາຍເຄື່ອງຊົ່ວຄາວ. ກ່ອນອື່ນໝົດລຸງເອົາໝາກຫຸ່ງ ແລະ ກາຣົດທີ່ໄດ້ຂູດເປັນເສັ້ນແລ້ວນັ້ນໃສ່ກັບໂຟມກ່ອນ, ຫຼັງຈາກນັ້ນແມ່ນເອົາຜັກຫອມໃສ່ໜ້ອຍໜຶ່ງ ແລະ ກໍ່ຕາມມາດ້ວຍຊີ້ນງົວແຫ້ງຕ່ອນບາງ ໃຫຍ່ເທົ່າ 1 ສ່ວນ 3 ຂອງຝາມືຖືກຕັດເປັນ ຕ່ອນນ້ອຍປົກໜ້າ, ແລ້ວເອົານໍ້າຍຳໃສ່ ເອົາໝາກຖົ່ວດິນ ຂົ້ວທີ່ຕຳແລ້ວນັ້ນ ໂຮຍໃສ່ເທິງ. ຍ້ອນນາງຮວາມັກກິນເຜັດ, ດັ່ງນັ້ນ ລຸງຈິ໋ນຈຶ່ງເອົາ ຊອັດ ໝາກເຜັດ ຕື່ມໃສ່ໜ້ອຍໜຶ່ງ. ນາງຮວາເວົ້າວ່າ :
“ສຳລັບຍຳໝາກຫຸ່ງໃສ່ຊີ້ນງົວແຫ້ງກໍສາມາດກິນໄດ້ໃນຕະຫຼອດປີ, ລົດຊາດກອບໆເຢັນໆຂອງໝາກຫຸ່ງ, ກິ່ນຫອມ ຂອງຜັກຫອມ, ລົດຊາດພິເສດຂອງຊີ້ນງົວແຫ້ງ, ແລະ ຄວາມກົມກຽວຂອງໝາກຖົ່ວດິນປະສົມ ໃສ່ກັບນໍ້າຍຳທີ່ມີລົດສົ້ມ, ຫວານ ແລະ ເຜັດ, ດັງນັ້ນ ກິນແຊບຫຼາຍ”
ແຕ່ວ່າບໍ່ແມ່ນຮ້ານຂາຍຍຳໝາກຫຸ່ງໃດກໍແຊບເຊັ່ນກັນ. ຕາມລຸງຈິ໋ນແລ້ວ, ເຄັດລັບແມ່ນຢູ່ທີ່ການປຸງແຕ່ງຊີ້ນງົວແຫ້ງ ແລະ ນໍ້າຍຳ. ລຸງຈິ໋ນໃຫ້ຮູ້ວ່າ :
“ ເມື່ອເວລາທີ່ຫາກໍ່ເລີ່ມຂາຍ ຂ້າພະເຈົ້າໄດ້ຊື້ເອົາຊີ້ນງົວແຫ້ງສຳເລັດຮູບທີ່ວາງຂາຍໃນທ້ອງຕະຫຼາດ ແຕ່ປະຈຸບັນປະຊາຊົນບໍ່ມັກກິນຊີ້ນງົວແຫ້ງປະເພດນັ້ນອີກແລ້ວ ສະນັ້ນຂ້າພະເຈົ້າຈຶ່ງຊື້ຊີ້ນງົວສົດມາເອືອບເອງ. ເວົ້າແທ້ ຕ້ອງມີເຄັດລັບໃນການປຸງແຕ່ງ ຂ້າພະເຈົ້າຈຶ່ງໄດ້ຂາຍດີທີ່ສຸດ, ແລະ ເຄັດລັບນັ້ນກໍ່ແມ່ນວິທີປະສົມນ້ຳຍຳ ແລະ ວິທີເອືອບຊີ້ນງົວແຫ້ງນີ້ເອງ”
ສຽງຕັດມີດຕັດດັງແກັບໆຄ່ອຍໆໝົດໄປ, ລຸງເຂົ້າໄປຮ່ອມນ້ອຍບ່ອນທີ່ມີແຂກຫາກໍ່ເອີ້ນໃສ່ລຸງ. ປະມານເກືອບ 5 ໂມງແລງ ຍຳໝາກຫຸ່ງກໍ່ເຫຼືອພຽງແຕ່ປະມານ ສິບ ກັບເທົ່ານັ້ນ ແລະ ຄິດວ່າມື້ນີ້ລຸງຈີ໋ນຈະຕ້ອງໄດ້ກັບບ້ານໄວ.
-----------------------
ຖ້າຫາກພວກເພື່ອນຢາກປຸງແຕ່ງເຍື່ອງອາຫານວ່າງ: ຍຳໝາກຫຸ່ງໃສ່ຊີ້ນງົວແຫ້ງໃຫ້ຄອບຄົວກິນ, ເພື່ອນຈົ່ງກະກຽມວັດຖຸດິບ ດັ່ງນີ້:
ໝາກຫຸ່ງທີ່ຂູດເປັນເສັ້ນແລ້ວ 200 g
ກາຣົດທີ່ຂູດແລ້ວ 200 g ແລະ ຊີ້ນງົວແຫ້ງຈີກເປັນເສັ້ນ
ເຄື່ອງປຸງ: ພິກໄທ 1 ສ່ວນ 4 ບ່ວງກາເຟ, ໝາກເຜັດໜ່ວຍໜຶ່ງຊອຍສະຫຼຽງ, ຜັກທຽມຝັກລະອຽດ 1 ບ່ວງກາເຟ.
- ຜັກບົວລະພາ, ຜັກກ້ານກ່ຳ ແລະ ຜັກຂະແຍງຊອຍນ້ອຍ.
- ວິທີປຸງນ້ຳຍຳ: ເອົານ້ຳໝາກນາວໜຶ່ງບ່ວງແກງ, ນ້ຳປາໜຶ່ງບວ່ງເຄິ່ງ, ນ້ຳສະອີ້ວໜຶ່ງບ່ວງ, ນ້ຳຕານໜຶ່ງບ່ວງເຄິ່ງ, ນ້ຳດຶ່ມສະອາດສາມບ່ວງປະສົມໃສ່ກັນພ້ອມກັບໝາກເຜັດ ແລະ ຜັກທຽມທີ່ໄດ້ຟັກລະອຽດແລ້ວນັ້ນໃສ່ໃນຖ້ວຍ.
ວິທີເຮັດ: ເອົາໝາກຫຸ່ງ, ກາຣົດທັງໝົດໃສ່ໃນຖ້ວຍໃຫຍ່ແລ້ວຄົນໃຫ້ສະໝ່ຳສະເໝີ. ຫຼັງຈາກນັ້ນເອົານ້ຳຍຳທີ່ປຸງແລ້ວນັ້ນໃສ່ເຄຶ່ງໜຶ່ງ ແລ້ວຄົນໃຫ້ທົ່ວ. ສຸດທ້າຍເອົາພິກໄທ, ໝາກເຜັດ, ຜັກທຽມທີ່ໄດ້ກະກຽມໄວ້ນັ້ນໃສ່ ພ້ອມກັບຊີ້ນງົວແຫ້ງ ແລະ ຜັກຫອມ ຄົນໃຫ້ເຂົ້າກັນ ແລ້ວຊີມລອງເບິ່ງຖ້າພໍດີເປັນອັນວ່າສຳເລັດ./.