ເຍື່ອງອາຫານຍຳແມງກະພຸນແດງແມ່ນເລີ່ມມາຈາກນະຄອນຫາຍຟ່ອງ, ແລ້ວ ກໍແຜ່ຂະຫຍາຍຮອດນະຄອນຫຼວງຮ່າໂນ້ຍ. ນີ້ແມ່ນເຍື່ອງອາຫານທີ່ໄດ້ຮັບຄວາມນິຍົມບໍລິໂພກຈາກຫຼາຍຄົນ, ບໍ່ພຽງແຕ່ຍ້ອນມັນມີສີແດງທີ່ງາມຕາເທົ່ານັ້ນ, ຫາກຍັງມີລົດຊາດພິເສດຂອງມັນອີກດ້ວຍ.
ຍຳແມງກະພຸນແດງ-ເຍື່ອງອາຫານພິເສດຂອງນະຄອນຫາຍຟ່ອງ |
ແຕ່ລະມື້, ຮອດເວລາ 16 ໂມງ, ຮ້ານຂາຍຍຳແມງກະພຸນແດງຂອງນາງ ຫງວຽນທິເງ່ ຕັ້ງຢູ່ຖະໜົນເດືອງແທ່ງ, ຮ່າໂນ້ຍ ໄດ້ມີແຂກມາກິນເຕັມ. ຢູ່ເບື້ອງຂວາຂອງຮ້ານ, ປ້າເຫ້ວ ແລະ ເອື້ອຍຮ່ວາພວມນັ່ງກິນຍຳແມງກະພຸນແດງໂດຍຖືກໃສ່ຖ້ວຍໃຫຍ່, ຄຽງຂ້າງແມ່ນຖ້ວຍນ້ຳແຈ່ວກະປິ ແລະ ຈານເຕົາຮູ້ຈືນ, ນວນໝາກພ້າວຖືກຊອຍເປັນປ່ຽງນ້ອຍຊຳນິ້ວມື ພ້ອມກັບຜັກຫອມອີກດ້ວຍ. ປ້າເຫ້ວ ໃຫ້ຮູ້ວ່າ :
“ ທຳອິດ, ເມື່ອຫາກໍໄດ້ກິນ, ຂ້າພະເຈົ້າກໍບໍ່ມັກລົດຊາດຂອງມັນປານໃດ, ແຕ່ເມື່ອໄດ້ກິນເທື່ອທີ 2 ທີ 3 , ຂ້າພະເຈົ້າກໍຄ່ອຍຮູ້ສຶກໄດ້ເຖິງລົດຫອມເຢັນ ແລະ ກອບດີ. ແຊບທີ່ສຸດແມ່ນໄດ້ກິນຍຳແມງກະພຸນຈ້ຳກັບນ້ຳແຈ່ວກະປິ. ເຍື່ອງອາຫານຍຳແມງກະພຸນແດງ ພຽງແຕ່ມີນັບແຕ່ເດືອນ 2 ຫາເດືອນ 5. ຍ້ອນເຫດນີ້ເອງ, ເມື່ອຮອດຍາມມີແມງກະພຸນແດງ, ຂ້າພະເຈົ້າກໍສະຫຼະເວລາພ້ອມກັບພີນ້ອງ, ໝູ່ເພື່ອນໄປກິນເຍື່ອງອາຫານນີ້ ”
ສ່ວນເອື້ອຍຮ່ວາ ເວົ້າວ່າ :
“ ປີໃດກໍເຊັ່ນດຽວກັນ, ຮອດຍາມມີແມງກະພຸນແດງ, ຂ້າພະເຈົ້າກໍສະຫຼະເວລາໄປກິນຢູ່ຮ້ານ, ເພາະໝົດຍາມແມງກະພຸນແດງ ກໍບໍ່ໄດ້ກິນເລີຍ. ເຍື່ອງອາຫານຍຳແມງກະພຸນແດງ ເປັນອາຫານສາມາດແກ້ຮ້ອນ, ເມື່ອກິນແລ້ວ, ຮູ້ສຶກເຢັນ, ຖ້າມີຕຸ່ມ ກໍຫາຍໄປ. ຂ້າພະເຈົ້າມັກກິນເຍື່ອງອາຫານນີ້, ຂ້າພະເຈົ້າກໍເຄີຍມາກິນທຸກມື້”
ໂດຍນັ່ງຂ້າງຊາມແມງກະພຸນແດງທີ່ພວມແຊ່ນ້ຳ, ນາງເງ່ໃຊ້ໄມ້ໄຜ່ຂ້ຽວຕັດ ແມງກະພຸນເປັນຕອນນ້ອຍຊ່ຳນິ້ວມື, ແລ້ວເອົາໃສ່ຖ້ວຍໃຫຍ່ເພື່ອນຳເອົາໄປໃຫ້ແຂກ. ຢູ່ເບື້ອງຂວາມືຂອງນາງ ແມ່ນກວດນ້ຳແຈ່ວກະປິ ພ້ອມກັບແປ້ງນົວ, ໝາກເຜັດ, ນ້ຳສົ້ມ…ນາງເງ່ໃຫ້ຮູ້ວ່າ : ພາຍຫຼັງໄດ້ຮັບແມງກະພຸນເອົາມາຈາກນະຄອນຫາຍຟ່ອງ, ຈະເອົາແມງກະພຸນໃສ່ຊາມມີນ້ຳສະອາດ, ແລ້ວກໍເອົາໝາກແປ້ນໂດຍຕັດເປັນປ່ຽງບາງໆໃສ່ນຳເພື່ອສ້າງລົດຫອມໃຫ້ແມງກະພຸນ. ນາງເງ່ເປີດເຜີຍວ່າ :
“ ຍ້ອນແມງກະພຸນຕິດຊາຍຫຼາຍ, ດັ່ງນັ້ນ ຂ້າພະເຈົ້າຕ້ອງລ້າງໃຫ້ສະອາດ, ຫຼັງຈາກນັ້ນກໍເອົາແມງກະພຸນໃສ່ຊາມມີນ້ຳບໍລິສຸດ. ແມງກະພຸນນີ້ ເມື່ອຊື້ມາ ກໍບໍ່ຕ້ອງປຸງແຕ່ງຫຍັງເລີຍ ເພາະເຂົາເຈົ້າໄດ້ເຮັດຮຽບຮ້ອຍແລ້ວ. ຖ້າຫາກແມງກະພຸນແດງໝົດແລ້ວ, ຂ້າພະເຈົ້າກໍເອົາແມງກະພຸນຂາວມາທົດແທນຊົ່ວຄາວເພື່ອຮັບໃຊ້ແຂກມາກິນ. ເມື່ອເອົາແມງກະພຸນແຊ່ນ້ຳ, ກໍຕ້ອງເອົາໝາກນາວຫຼືໝາກແປ້ນໂດຍຕັດເປັນປ່ຽງບາງໆໃສ່ຕື່ມເພື່ອສ້າງລົດຫອມ. ສຳລັບເຍື່ອງອາຫານຍຳແມງກະພຸນນີ້, ເມື່ອກິນກໍຕ້ອງຈ້ຳກັບນ້ຳແຈ່ວກະປິ ກໍຍິ່ງແຊບ”
ພາຍຫຼັງຕັດເອົາແມງກະພຸນ, ນາງເງ່ກໍຕັກເອົານ້ຳແຈ່ວກະປິໃສ່ຖ້ວຍນ້ອຍໃຫ້ແຂກ. ສຳລັບໝາກນາວ, ໝາກເຜັດ ແຂກກໍໃສ່ຕາມໃຈ. ແລ້ວ, ນາງເງ່ກໍຕັດເຕົາຮູ້ຈືນທີ່ສຸກເຫຼືອງເປັນຫຼາຍຕ່ອນນ້ອຍ, ຈາກນັ້ນ ນາງເງ່ກໍເອົານວນໝາກພ້າວໂດຍຖືກຊອຍເປັນປ່ຽງບາງໆ, ຍາວຊ່ຳນິ້ວມືໃສ່ເທິງເຕົາຮູ້, ແລ້ວກໍນຳເອົາໃຫ້ແຂກ. ນາງເງ່ໃຫ້ຮູ້ວ່າ ເຍື່ອງອາຫານຍຳແມງກະພຸນ ພູດໜຶ່ງມີລາຄາປະມານ 20.000 ດົງເທົ່ານັ້ນ.
ທ່ານຜູ້ຟັງທີ່ເຄົາລົບ! ຖ້າຫາກພວກເພື່ອນຢາກປຸງແຕ່ງເຍື່ອງອາຫານຍຳແມງກະພຸນແດງ, ພວກເພື່ອນຕ້ອງກະກຽມວັດຖຸດິບດັ່ງນີ້:
- ແມງກະພຸນແດງ : 1,5 ກິໂລຣາມ
- ຜັກຫອມເຮືອດ ແລະ ຜັກຫອມອື່ນໆ : 1,5 ກິໂລຣາມ
ນວນໝາກພ້າວ, ເຕົາຮູ້ຈືນ, ນ້ຳແຈ່ວກະປິ…
ທຳອິດ. ຕ້ອງລ້າງແມງກະພຸນໃຫ້ສະອາດ, ແລ້ວເອົາແຊ່ນ້ຳບໍລິສຸດປະມານ 4-5 ວັນໂດຍເອົາໃບໝາກເດື່ອ ແລະ ເກືອໃສ່ຕື່ມ. ຕໍ່ຈາກນັ້ນ ກໍຕ້ອງລ້າງອີກເທື່ອໜຶ່ງດ້ວຍນ້ຳໝາກນາວ, ແລ້ວກໍຕັດຊອຍເປັນຕອ່ນນ້ອຍຊ່ຳນິ້ວມື.
- ຕ້ອງລ້າງນ້ຳຫອມໃຫ້ສະອາດ
- ນວນໝາກພ້າວຊອຍເປັນປ່ຽງບາງໆ
- ຕັດເຕົາຮູ້ຈີນເປັນຕອນພໍດີ
ຕັດນ້ຳແຈ່ວກະປິໃສ່ຖ້ວຍນ້ອບ, ແລ້ວກໍໃສ່ໝາກນາວ ແລະ ຄົນໃຫ້ສະໝ່ຳສະເໝີ. ມາຮອດນີ້, ເຍື່ອງອາຫານຍຳແມງກະພຸນແດງໄດ້ປຸງແຕ່ງສຳເລັດແລ້ວ. ຫວັງວ່າພວກເພື່ອນຈະເຮັດກິນແຊບ.