ດ້ວຍຕະຫຼາດມີປະຊາກອນກວ່າ 1,6 ຕື້ຄົນ, ມີເນື້ອທີ່ກວ້າງກວ່າ 36 ລ້ານ Km2, ຕາເວັນອອກກາງ - ອາຟະລິກາ ແມ່ນພາກພື້ນທີ່ມີຄວາມສາມາດບົ່່ມຊ້ອນຫຼາຍຢ່າງໃນການຮ່ວມມື. ກົງກັນຂ້າມ, ຫວຽດນາມ ແມ່ນປະເທດພວມພັດທະນາຢູ່ພາກພື້ນອາຊີຕາເວັນອອກສ່ຽງໃຕ້, ເຊິ່ງເປັນພາກພື້ນທີ່ມີການເຕີບໂຕໄວທີ່ສຸດໃນ ອາຊີ-ປາຊີຟິກ. ໃນຈໍານວນ 70 ປະເທດຢູ່ ຕາເວັນອອກກາງ - ອາຟະລິກາ, ມາຮອດປັດຈຸບັນ, ຫວຽດນາມ ໄດ້ສ້າງຕັ້ງການພົວພັນທາງການທູດກັບ 69 ໃນຈໍານວນ 70 ປະເທດ; ມີການພົວພັນທາງການຄ້າກັບທຸກປະເທດໃນພາກພື້ນ ດ້ວຍວົງເງິນການຄ້າສອງສົ້ນບັນລຸກວ່່າ 17,5 ຕື້ USD ປີ 2018, ເພີ່ມຂຶ້ນ 300% ເມື່ອທຽບໃສ່ປີ 2008.

        ບັນດາປະເທດ ຕາເວັນອອກກາງ - ອາຟະລິກາ ລ້ວນແຕ່ມີສາຍພົວພັນມິດຕະພາບທີ່ເປັນມູນເຊື້ອກັບ ຫວຽດນາມ, ເຄີຍສະໜັບສະໜູນເຊິ່ງກັນແລະກັນໃນໄລຍະຕໍ່ສູ້ຍາດເອົາເອກະລາດໃຫ້ແກ່ປະເທດຊາດ ແລະ ພາລະກິດແຫ່ງການສ້າງສາ ແລະ ພັດທະນາເສດຖະກິດຂອງແຕ່ລະປະເທດ. ບັນດາປະເທດທີ່ມາຈາກ ອາຟະລິກາ, ຕາເວັນອອກກາງ ຕາງກໍຕີລາຄາສູງການພັດທະນາຂອງຫວຽດນາມ ໂດຍຖືວ່າ ໃນສະພາບການເຊື່ອມໂຍງເຂົ້າກັບສາກົນ ແລະ ການຮ່ວມສໍາພັນສາກົນພວມດໍາເນີນຢ່າງແຮງຢູ່ທັງ ທະວີບ ອາຊີ ແລະ ພາກພື້ນ ຕາເວັນອອກກາງ, ອາຟະລິກາ ດ້ວຍບັນດາຄວາມສາມາດບົ່ມຊ້ອນ ແລະ ທ່າແຮງຂອງຕົນທີ່ ສາມາດໜູນຊ່ວຍໃຫ້ແກ່ກັນນັ້ນ, ການພົວພັນຮ່ວມມືລະຫວ່າງຫວຽດນາມ ກັບບັນດາປະເທດ ຕາເວັນອອກກາງ, ອາຟະລິກາ ພວມມີກາລະໂອກາດຫຼາຍຢ່າງເພື່ອພັດທະນາດີກວ່າອີກ.

ທ່ານຮອງລັດຖະມົນຕີການຕ່າງປະເທດຫວຽດນາມ ຫງວຽນກວັກເກືື່ອງ (ພາບ: baoquocte.vn)

ທ່ານຮອງລັດຖະມົນຕີການຕ່າງປະເທດຫວຽດນາມ ຫງວຽນກວັກເກືື່ອງ ຖືວ່າ:

        “ການພົວພັນລະຫວ່າງຕາເວັນອອກກາງ, ອາຟະລິກາ ກັບ ຫວຽດນາມ ແມ່ນດີງາມທີ່ສຸດ ແລະ ມີມາແຕ່ດົນນານ. ປະເທດໃດຢູ່ ອາຟະລິກາ ເມື່ອເວົ້າເຖິງຫວຽດນາມ ກໍລ້ວນແຕ່ຮູ້ຈັກປະທານໂຮ່ຈີມິນ ແລະ ທ່ານພົນເອກຫວໍງວຽນຢ໊າບ. ການພົວພັນດ້ານການເມືອງແມ່ນດີຄືແນວນັ້ນ ແຕ່ຂ້າພະເຈົ້າຖືວ່າ ການພົວພັນດ້ານເສດຖະກິດແມ່ນຍັງບໍ່ທ່ວງທັນ. ມັນມີຫຼາຍສາເຫດ, ອາດຈະແມ່ນຍ້ອນຄວາມຮັບຮູ້ຂອງທັງສອງຝ່າຍກ່ຽວກັບຄວາມສໍາຄັນຂອງການພັດທະນາ, ການແລກປ່ຽນຂໍ້ມູນຂ່າວສານເຊິ່ງກັນແລະກັນຍັງມີຂໍ້ຈໍາກັດ. ດັ່ງນັ້ນ ຈຸດປະສົງສໍາຄັນຂອງບັນດາເອກອັກຄະລັດຖະທູດຫວຽດນາມທີ່ກອງປະຊຸມຄັ້ງນີ້ ແມ່ນຈະສະໜອງຂໍ້ມູນ ແລະ ແຈ້ງໃຫ້ເຂົາເຈົ້າຮັບຊາບກ່ຽວກັບສະພາບການຂອງຫວຽດນາມ ໃນໄລຍະຜ່ານມາກໍຄື ບັນດາການກໍານົດທິດຂອງພວກເຮົາໃນໄລຍະຈະມາເຖິງ”.

        ໃນສະພາບການພົວພັນຮ່ວມມືເສດຖະກິດລະຫວ່າງຫວຽດນາມ ແລະ ພາກພື້ນຕາເວັນອອກກາງ - ອາຟະລິກາ ທີ່ຍັງບໍ່ສົມກັບຄວາມສາມາດບົ່ມຊ້ອນ, ທັງຫວຽດນາມ ແລະ ບັນດາປະເທດຕາເວັນອອກກາງ - ອາຟະລິກາ ລ້ວນແຕ່ຮັບຮູ້ໄດ້ວ່າ ອັດຕາແລກປ່ຽນການຄ້າລະຫວ່າງຫວຽດນາມ ກັບພາກພື້ນຕາເວັນອອກກາງ, ອາຟະລິກາ ກວມເອົາພຽງແຕ່ 3,5% ໃນຈໍານວນ 480 ຕື້ USD ລວມຍອດມູນຄ່າການສົ່ງອອກສິນຄ້າຫວຽດນາມໃນປີ 2018 ເຊິ່ງຍັງແມ່ນຕົວເລກທີ່ຕໍ່າ ເມື່ອທຽບໃສ່ລະດັບການເຕີບໂຕ ແລະ ຂອບຂະໜາດເສດຖະກິດ ແລະ ປະຊາກອນຂອງທັງສອງຝ່າຍ. ສິ່ງດັ່ງກ່າວຮຽກຮ້ອງໃຫ້ບັນດາຝ່າຍ ຕ້ອງເຮັດຫຼາຍກວ່າອີກ, ມີຄວາມຕັດສິນໃຈກວ່າອີກ ແລະ ມີປະສິດທິຜົນກວ່າອີກ. ທ່ານເອກອັກຄະລັດຖະທູດ ອີຢິບ Mahmoud Hassan Nayel ຖືວ່າ:

ການພົວພັນດ້ານການຄ້າລະຫວ່າງ ຫວຽດນາມ ແລະ ອີຢີບໄດ້ເພີ່ມຂຶ້ນຢ່າງແຮງໃນໄລຍະທີ່ຜ່ານມາ, ປະມານ 100% ພາຍໃນ 3 ປີທີ່ຜ່ານມາ ແລະ ສະເພາະສຳລັບ ປີ 2018ແມ່ນເພີ່ມຂຶ້ນ 20%. ຂ້າພະເຈົ້າເຊື່ອໝັ້ນວ່າ ການພົວພັນນີ້ຍັງເຕີບໂຕຢ່າງແຮງກວ່າອີກໃນໄລຍະທີ່ຈະມາເຖິງ. ຂ້າພະເຈົ້າຖືວ່າ ບັນຫາຫຼັກແຫຼ່ງແມ່ນການຮັບຮູ້ຂໍ້ມູນຂອງກັນ, ແລະ ກອງປະຊຸມຄັ້ງນີ້ແມ່ນ ໂອກາດທີ່ດີເພື່ອໃຫ້ບັນດາຝ່າຍສາມາດຊອກຫາຂໍ້ມູນ, ກຳແໜ້ນໂອກາດການຮ່ວມມື, ຈາກນັ້ນຊຸກຍູ້ການຄ້າສອງສົ້ນລະຫວ່າງ ຫວຽດນາມ ກັບບັນດາປະເທດໃນພາກພື້ນ.

        ສ້າງການກະຕຸກຊຸກຍູ້ໃຫ້ແກ່ການຄ້າ, ການລົງທຶນ

        ໃນສະພາບການນັ້ນ, ຕ້ອງມີຫຼາຍການເຄື່ອນໄຫວກ່ວາອີກ, ນຳໃຊ້ບັນດາມາດຕະການເຕັກນິກເພື່ອໃຫ້ມະຫາຊົນ ຫວຽດນາມ ແລະ ບັນດາປະເທດ ທາງທິດຕາເວັນອອກກາງ - ອາຟະລິກາ ຮັບຮູ້ຕື່ມອີກກ່ຽວກັບວັດທະນະທຳ, ພາສາ, ເຂົ້າໃຈບັນດາຄວາມຫຍຸ້ງຍາກ, ສິ່ງທ້າທາຍເມື່ອມາຮ່ວມມືກັນ ແມ່ນໜ້າທີ່, ເປົ້າໝາຍຂອງກອງປະຊຸມ “ພົບປະເອກອັກຄະລັດຖະທູດ ບັນດາປະເທດຢູ່ທາງທິດຕາເວັນອອກກາງ - ອາຟະລິກາ 2019”. ຕາມທ່ານຮອງລັດຖະມົນຕີກະຊວງການຕ່າງປະເທດ ຫວຽດນາມ ຫງວຽນກວກເກຶອງແລ້ວ, ກອງປະຊຸມຄັ້ງນີ້ເພື່ອແນໃສ່ຜັນຂະຫຍາຍບົດບາດຂອງບັນດາທ່ານເອກອັກຖະລັດຖະທູດ, ເປັນຂົວເຊື່ອມຕໍ່ລະຫວ່າງ ຫວຽດນາມ ແລະ ຕາເວັນອອກກາງ - ອາຟະລິກາໃຫ້ມີປະສິດທິຜົນ. ທ່ານກ່າວວ່າ:

        ນີ້ ແມ່ນຄັ້ງທຳອິດທີ່ພວກເຮົາຈັດຕັ້ງກອງປະຊຸມດັ່ງກ່າວ, ເຊິ່ງນອນໃນຂອບເຂດແຜນຮ່າງພັດທະນາການພົວພັນລະຫວ່າງ ຫວຽດນາມ ຕາເວັນອອກກາງ ອາຟະລິກາໄລຍະ 2016 – 2020 ທີ່ໄດ້ຮັບການອະນຸມັດຜ່ານຈາກລັດຖະບານ. ຜ່ານກອງປະຊຸມນີ້, ປາດຖະໜາວ່າຈະສ້າງການກະຕຸກຊຸກຍູ້ໃຫ້ແກ່ການພົວພັນລະຫວ່າງ ຫວຽດນາມ ແລະ  ຕາເວັນອອກກາງອາຟະລິກາໃນໄລຍະຈະມາເຖິງ, ໃນກອງປະຊຸມຄັ້ງນີ້, ນອກຈາກການແລກປ່ຽນຂໍ້ມູນຂ່າວສານ, ເພີ່ມທະວີການຮັບຮູ້ແລ້ງ, ຫາກຍັງສຸມໃສ່ເຂົ້າ 3 ບັນຫາແມ່ນ: ຊຸກຍູ້ການພົວພັນເສດຖະກິດການຄ້າ, ການລົງທຶນລະຫວ່າງ ຫວຽດນາມ ຕາເວັນອອກກາງອາຟະລິກາໃນໄລຍະຈະມາເຖິງ, ສຸມໃສ່ເຂົ້າບັນດາຂົງເຂດເຊິ່ງເປັນທ່າແຮງຂອງພວກເຮົາ ແລະ ຂອງເຂົາເຈົ້າ.

        ໃນນະໂຍບາຍທາງການທູດ, ຫວຽດນາມ ຍາມໃດກໍ່ຖືເປັນສຳຄັນການເພີ່ມທະວີການພົວພັນຮ່ວມມືໃນຫຼາຍດ້ານກັບບັນດາປະເທດຢູ່ຕາເວັນອອກ ກາງ ອາຟະລິກາ. ຫຼາຍປະເທດໃນພາກພື້ນໄດ້ຕັ້ງໜ້າປະຕິບັດນະໂຍບາຍມຸ່ງໄປສູ່ທາງທິດຕາເວັນອອກ, ເພີ່ມທະວີການພົວພັນກັບບັນດາປະເທດ, ບັນດາພື້ນຖານເສດຖະກິດຫາກໍ່ພົ້ນເດັ່ນຢູ່ ອາຊີ, ໃນນັ້ນມີ ຫວຽດນາມ. ພິເສດ, ໃນໄລຍະຜ່ານມາ, ບັນດາປະເທດຢູ່ຕາເວັນອອກກາງ ອາຟະລິກາສະໜັບກໍ່ໄດ້ສະໜູນຫວຽດນາມຢ່າງແຮງໃນເລື່ອງດຳລົງຕຳແໜ່ງເປັນກຳມະການບໍ່ປະຈຳການຂອງສະພາຄວາມໝັ້ນຄົງ ສປຊ. ການພົວພັນດ້ານການເມືອງອັນດີງານນັ້ນພວມແມ່ນພື້ນຖານທີ່ໝັ້ນແກ່ນເພື່ອໃຫ້ ຫວຽດນາມ ແລະ ພາກພື້ນຕາເວັນອອກກາງອາຟະລິກາຊຸກຍູ້ການຮ່ວມມືໃນຫຼາຍດ້ານໃຫ້ຫຼາຍກ່ວາອີກໃນໄລຍະຈະມາເຖິງ.