ມີເດັກຫຼາຍຄົນເຂົ້າຮ່ວມຊຸດຮຽນເສບພິນຕີ້ງໂດຍນັກສິລະປະການ ດິງວັນທຶກເປັນຜູ້ຖ່າຍທອດ

ຕາແສງ ຫວູມິງ ເມືອງ ງວຽນບິ່ງ ມີຈຳນວນປະຊາກອນກວ່າ 60% ແມ່ນຊາວເຜົ່າໄຕ, ເຜົ່ານຸ່ງ. ນັບແຕ່ໃດໆມາ, ສິລະປະຂັບແທນ, ຂັບສະລີ, ຂັບເລື້ອນ ມີບົດລາດສຳຄັນທີ່ສຸດ, ແມ່ນສິ່ງທີ່ຂາດບໍ່ໄດ້ໃນຊີວິດທາງດ້ານຈິດໃຈ ຂອງພໍ່ແມ່ປະຊາຊົນຢູ່ແຫ່ງນີ້. ນັກສິລະປິນດີເລີດ ດິງວັນທຶກ ແມ່ນຜູ້ສ້າງຕັ້ງສະໂມສອນ ຂັບແທນ - ພິນຕິ໊ງ ມິງແອັງ ເພື່ອດຶງດູດຫຼາຍຄົນເຂົ້າຮ່ວມ, ທັງເປັນການຮັກສາ ແລະ ຖ່າຍທອດບັນດາຄວາມງາມທາງດ້ານວັດທະນະທຳຂອງຊາວເຜົ່າໄຕ, ເຜົ່ານຸ່ງ ໃຫ້ແກ່ຄົນລຸ້ນຫຼັງ. ນັກສິລະປະການດີເລີດ ດິງວັນທຶກ ໃຫ້ຮູ້ວ່າ:

        “ໃນເບື້ອງຕົ້ນກໍ່ແມ່ນການຝຶກແອບຂັບຮ້ອງ ເພື່ອສ້າງຄວາມມ່ວນຊື່ນເທົ່ານັ້ນ, ແຕ່ເມື່ອຂັບຮ້ອງແລ້ວ ໄດ້ຮັບການຍ້ອງຍໍ ລະດົມກຳລັງໃຈຈາກປະຊາຊົນ. ແລ້ວກໍ່ຄ່ອຍໆໄປສະແດງ ແລະ ໄດ້ຮັບການລະດົມໃຈຈາກປະຊາຊົນເຊັ່ນນັ້ນ ກໍ່ແມ່ນຄວາມຫວັງໃຫ້ພວກນັກຮຽນທີ່ພວມຮຽນຊັ້ນອະນຸບານ, ຊັ້ນປະຖົມ, ຊັ້ນມັດທະຍົມໃຫ້ໄດ້ເຂົ້າຮຽນ.ຈາກນັ້ນກໍ່ແມ່ນແຫຼ່ງລະດົມກຳລັງໃຈ ເພື່ອໃຫ້ຂ້າພະເຈົ້າສ້າງຕັ້ງສະໂມສອນ ແລະ ພະຍາຍາມກ້າວໄປໄກກວ່າອີກ.”

        ນັກສິລະປະການດີເລີດ ດິງວັນທຶກ ແລະ ພວກນັກຮຽນ ໄດ້ທຳການສະແດງບັນດາລາຍການທີ່ເຂັ້ມຂົ້ນໄປດ້ວຍສີສັນພື້ນເມືອງ ທີ່ເປັນເອກະລັກຢູ່ບັນດາງານບຸນ, ງານປະກວດສິລະປະດ້ວຍຂອບຂະໜາດໃຫຍ່ ທັງຢູ່ພາຍໃນ ແລະ ຕ່າງແຂວງ. ຈາກການເຊື່ອມຕໍ່, ແຜ່ຂະຫຍາຍຢ່າງແຂງແຮງນັ້ນ, ສິລະປະ ຂັບແທນ - ພິນຕິ໊ງ ແລະ ຂັບລຳທຳເພງພື້ນເມືອງ ໄດ້ຊຶມເລິກເຂົ້າໃນທຸກໆຂົງເຂດຊີວິດຢູ່ເມືອງ ຫວູມິງ ອັນໄດ້ສ້າງຄວາມເມົາມົວ ແລະ ຄວາມນິຍົມຊົມຊອບສິລະປະ ໃຫ້ແກ່ປະຊາຊົນຢູ່ແຫ່ງນີ້. ປ້າ ໝາກທິຝຽນ ຊາວບ້ານ ນ່າຄວາງ ຕາແສງ ຫວູມິງ ເມືອງ ງວຽນບິ່ງ ແບ່ງປັນວ່າ:

      “ຂັບແທນ - ພິນຕິ໊ງ ໃນທຸກວັນນີ້ ໄດ້ສະເໜີໂຕ ສະໂມສອນ ຂັບລຳທຳເພງພື້ນເມືອງ ມິງແອັງ, ດັ່ງນັ້ນຂ້າພະເຈົ້າດີໃຈຫຼາຍ. ປັດຈຸບັນໄດ້ມີລຸ້ນສືບທອດ ເພື່ອຮັກສາສິລະປະຂັບລຳທຳເພງພື້ນເມືອງ  ບໍ່ໃຫ້ມັນສູນຫາຍໄປ, ຂະບວນການຂັບລຳທຳເພງພື້ນເມືອງຂອງຕາແສງ ຈະນັບມື້ນັບຂະຫຍາຍຕົວກວ່າເກົ່າ.  ຂ້າພະເຈົ້າມີຄວາມຫວັງວ່າ ເຮັດແນວໃດໃນໄລຍະທີ່ຈະມາເຖິງ, ທາງສະໂມສອນຈະມີການເຄື່ອນໄຫວຫຼາຍຢ່າງ ເພື່ອຮັບໃຊ້ປະຊາຊົນທັງເປັນການຊ່ວຍໃຫ້ຊີວິດທາງດ້ານຈິດໃຈ ຂອງຊາວບ້ານໄດ້ຮັບການຍົກສູງຂຶ້ນ”.

       ສະໂມສອນຂັບແທນ - ພິນຕິ໊ງ ແລະ ຂັບລຳທຳເພງພື້ນເມືອງ ມິງແທັງ ໄດ້ກໍ່ສ້າງຖັນແຖວນັກຮ້ອງ, ນັກສິລະປະກອນດີເດັ່ນ ແມ່ນແຫ່ງສ້າງຄວາມໃຝ່ຝັນ ຄວາມນິຍົມຊົມຊອບສິລະປະຂັບລຳທຳເພງພື້ນເມືອງ ຂອງຫຼາຍພາກສ່ວນທຸກເພດທຸກໄວ ນັບແຕ່ເມື່ອໄດ້ສ້າງຕັ້ງ, ບັນດາສະມາຊິກໃນສະໂມສອນ ຍາມໃດກໍ່ມີຄວາມຫ້າວຫັນເຂົ້າຮ່ວມບັນດາລາຍການສະແດງຂັ້ນຕ່າງໆ ຈາກທ້ອງຖິ່ນຕະຫຼອດຮອດທົ່ວປະເທດຢ່າງສຸດໃຈ, ເຂົ້າຮ່ວມບັນດາລາຍການໂຄສະນາສື່່ສານຢູ່ 12 ຕາແສງໃນເມືອງ ງວຽນບິ່ງ, ໄດ້ຮັບການຍ້ອງຍໍຊົມເຊີຍຈາກປະຊາຊົນ. ພ້ອມກັບການເຂົ້າຮ່ວມລາຍການສະແດງ, ນັກສິລະປະການດີເລີດ ດິງວັນທຶກ ຍັງເປີດຊຸດຮຽນ ຂັບແທນ - ພິນຕິ໊ງ ແລະ ຂັບລຳທຳເພງພື້ນເມືອງໂດຍບໍ່ໄດ້ຄິດຄ່າ ຢູ່ໃນເຮືອນສ່ວນຕົວ. ປັດຈຸບັນມີນັກຮຽນຫຼາຍກວ່າ 360 ຄົນ ພວມຮຽນຂັບແທນ, ໃນນັ້ນສະມາຊິກໜຸ່ມກວ່າໝູ່ແມ່ນໄວ 6 ປີ. ນາງ ຫວຽນຮົ່ງເວິນ ຮອງຫົວໜ້າພະແນກວັດທະນະທຳ ກິລາ ແລະ ທ່ອງທ່ຽວ ແຂວງ ກາວບັ່ງ ໃຫ້ຮູ້ວ່າ:

     “ດິງວັນທຶກ ແມ່ນນັກສິລະປະການດີເລີດ, ເປັນຜູ້ສຸມຈິດສຸມໃຈກັບວຽກງານສິລະປະ ນັບຕັ້ງແຕ່ວັນສ້າງຕັ້ງ, ມາຮອດປັດຈຸບັນ ສະໂມສອນໄດ້ມີກົນໄກເຄື່ອນໄຫວຢ່າງເປັນທາງການ. ແລະ ນີ້ກໍ່ແມ່ນໜຶ່ງ ໃນບັນດາໜ້າທີ່ ໃນເວລາທີ່ຈະມາເຖິງ ເພື່ອປະຕິບັດໂຄງການເຄື່ອນໄຫວ ຂະນະທີ່ອົງການ Unesco ຮັບຮອງ ສິລະປະ ຂັບແທນ ແມ່ນມໍລະດົກວັດທະນະທຳບໍ່ເປັນວັດຖຸ ເປັນຕົວແທນຂອງມວນມະນຸດ”.