(vovworld) - ໃນອາທິດຜ່ານມາ, ລາຍການພາກພາສາລາວ, ວິທະຍຸກະຈາຍສຽງຫວຽດນາມ, ໄດ້ຮັບໂທລະສັບ, ອີແມວ, ຈົດໝາຍຈາກຜູ້ຟັງລາວ ທີ່ສົ່ງມາລາຍການ. ໃນລາຍການໂອ້ລົມກັບເພື່ອນລາວ ມື້ນີ້, ພວກເຮົາຂໍຄັດສະເໜີເນື້ອໃນຈົດໝາຍ ແລະ ຕອບບາງຄຳຖາມເຊິ່ງທ່ານຜູ້ຟັງໄດ້ຝາກມາລາຍການ.
ເພື່ອນ ສຸວັນ ທິບພະຈັນ, ຫົວໜ້າຫ້ອງການທ່ອງທ່ຽວ, ເມືອງປາກລາຍ, ແຂວງໄຊຍະບູລີ ໄດ້ຝາກຈົດໝາຍມາຍັງລາຍການ ໂດຍໃຫ້ຮູ້ວ່າ: ໃນກາງເດືອນ 10 ຜ່ານມາ, ຂ້າພະເຈົ້າໄດ້ຮັບໃບຢັ້ງຢືນການຕິດຕາມຟັງຕະຫຼອດໄລຍະ 3 ປີ, ພ້ອບກັບຂອງຂວັນຂອງ VOV. ຂ້າພະເຈົ້າໄດ້ຮັບຝັງລາຍການເປັນປະຈຳ ແລະ ສ່ວນຫຼາຍແມ່ນໃນເວລາ 18 ໂມງ ແລະ 20 ໂມງ 30 ນາທີຂອງທຸກໆແລງ, ມື້ໃດບໍ່ມີຟ້າຝົນສຽງກໍຟັງແຈ້ງດີ, ມື້ໃດຫາກມີຟ້າຮ້ອງສຽງກໍ່ບໍ່ແຈ້ງ ແລະ ມີສຽງລົບກວນ.
ຂໍຂອບໃຈເພື່ອນ ສຸວັນ ທິບພະຈັນ ທີີ່່ໄດ້ຝາກຈົດໝາຍມາລາຍການ ແລະແບ່ງປັນຄວາມເຫັນກັບພວກຂ້າພະເຈົ້າ. ຫວັງວ່າ, ເພື່ອນຍັງຄົງສືບຕໍ່ຮັບຟັງ ແລະ ອ່ານລາຍການຂອງພວກເຮົາເປັນປະຈຳ ແລະ ຫວັງວ່າພວກຂ້າພະເຈົ້າຈະໄດ້ຮັບຈົດໝາຍ ກໍ່ຄືຄຳເຫັນປະກອບຂອງເພື່ອນຕໍ່ໄປອີກ ເພື່ອເຮັດໃຫ້ລາຍການນັບມື້ນັບຕອບສະໜອງໄດ້ຄວາມຕ້ອງການຂອງທ່ານຜູ້ຟັງ. ຂໍອວຍພອນໃຫ້ເພື່ອນຈົ່ງມີສຸຂະພາບເຂັ້ມແຂງ, ມີຄວາມຜາສຸກ ແລະ ປະສົບສຳເລັດໃນໜ້າທີ່ວຽກງານຂອງຕົນ.
.jpg)
ເພື່່ອນ ພົງສະຫວັນ ບຸດດາຄຳ, ຢູ່ແຂວງວຽງຈັນ ໄດ້ສົ່ງອີກແມວມາຍັງລາຍການໃຫ້ຮູ້ວ່າ: ໃນອາທິດຜ່ານມາ, ຂ້າພະເຈົ້າໄດ້ຍິນຂ່າວວ່າຄະນະນັກສິລະປະຂອງໂຮງລະຄອນສິລະປະ ຫວຽດນາມ ໄດ້ມີລາຍການສະແດງສີລະປະເພື່ອຂ່ຳນັບຮັບຕ້ອນເຫດການສະເຫຼີມສະຫຼອງ 40 ປີແຫ່ງວັນສະຖາປະນາປະເທດ ສປປ ລາວ? ແຕ່ໜ້າເສຍດາຍຂ້າພະເຈົ້າພັດບໍ່ໄດ້ຮັບຟັງຂ່າວນີ້ເທື່ອ. ສະນັ້ນ, ຜ່ານລາຍການນີ້ຂໍໄດ້ຟັງຄືນຈະໄດ້ບໍ່?
ເພື່່ອນ ພົງສະຫວັນ ບຸດດາຄຳ ທີ່ຮັກແພງ, ໃນອາທິດຜ່ານມາ, ຢູ່ນະຄອນຫລວງ ວຽງຈັນ, ສປປ ລາວ. ໄດ້ຈັດລາຍການສະແດງສິລະປະພິເສດດ້ວຍຫົວຂໍ້ວ່າ: ຂົວເຊື່ອມຕໍ່ມິດຕະພາບ ນ້ຳໃຈສາມັກຄີຖານອ້າຍນ້ອງ ຫວຽດນາມ - ລາວ, ເພື່ອຂ່ຳນັບຮັບຕ້ອນເຫດການສະເຫຼີມສະຫຼອງ 40 ປີແຫ່ງວັນຊາດ ສປປ ລາວ (2/12/1975 – 2/12/2015), ລາຍການນີ້ໂດຍກະຊວງຖະແຫຼງຂ່າວ ວັດທະນະທຳ ແລະ ທ່ອງທ່ຽວລາວ ແລະ ກະຊວງວັດທະນະທຳ, ກິລາ ແລະ ທ່ອງທ່ຽວຫວຽດນາມ ສົມທົບກັນຈັດຕັ້ງ. ການສະແດງຄັ້ງນີ້ມີນັກສິລະປີນ 30 ຄົນ ຂອງໂຮງລະຄອນສິລະປະ ຫວຽດນາມ ສະຫະພັນ ກາຍຍະສິນຫວຽດນາມ, ກອງສິລະປະກອນລ້າງເຊີນ.. ເຂົ້າຮ່ວມ. ກ່າວຄຳເຫັນທີ່ພິທີເປີດລາຍການສະແດງ, ນັກດົນຕີ, ນັກສິລະປິນດີເດັ່ນ ຫງວຽນກວາງວິງ ຜູ້ອຳນວຍການໂຮງລະຄອນສິປະປະຫວຽດນາມ ໃຫ້ຮູ້ວ່າ, ພວກຂ້າພະເຈົ້າໄດ້ນຳເອົາບັນດາລາຍການສະແດງທີ່ເຕັມໄປດ້ວຍອາລົມຈິດຂອງປະຊາຊົນຫວຽດນາມ ເຖິງປະຊາຊົນລາວ, ເພື່ອອວຍພອນບັນດາຜົນງານເຊິ່ງປະເທດລາວ ຍາດມາໄດ້ໃນໄລຍະ 40 ປີຜ່າມມາ. ດ້ວຍຈຸດປະສົງຮັບໃຊ້ເຫດການສະເຫຼີມສະຫຼອງ 40 ປີແຫ່ງວັນຊາດລາວ. ພວກຂ້າພະເຈົ້າຢາກສະແດງບັນດາທຳນອງເພງ, ວາດຟ້ອນ ກ່ຽວກັບນ້ຳໃຈສາມັກຄີລະຫວ່າງຫວຽດນາມ ແລະ ລາວໃນວິວັດແຫ່ງການຕໍ່ສູ້, ປົກປັກຮັກສາ ແລະ ສ້າງສາປະເທດຊາດ.
ເພື່ອນສີສຸກ, ຢູ່ແຂວງຄຳມ່ວນ ຝາກອີແມວມາລາຍການ ໃຫ້ຮູ້ວ່າ: ໃນປີ 2016, ລາວຈະດຳລົງຕຳແໜ່ງເປັນປະທານອາຊຽນ. ໃນອາທິດຜ່ານມາ, ຝ່າຍຫວຽດນາມ ໄດ້ຈັດຊຸດບຳລຸງວິຊາການສື່ມວນຊົນໃຫ້ນັກຂ່າວລາວ. ຂ້າພະເຈົ້າຢາກຊອກຮູ້ເນື້ອໃນຂອງຊຸດບຳລຸງດັ່ງກ່າວ.
ເພື່ອນສີສຸກ ທີ່ຮັກແພງ, ພິທີເປີດຊຸດບຳລຸງວິຊາການສື່ມວນຊົນໃຫ້ນັກຂ່າວລາວ ດ້ວຍຫົວຂໍ້ “ທັກສະໃນການຂຽນຂ່າວ, ບົດ ໃຫ້ແກ່ບັນດາເຫດການໃຫຍ່” ໄດ້ດຳເນີນໃນອາທິດຜ່ານມາ ຢູ່ນະຄອນຫຼວງວຽງຈັນ. ນີ້ແມ່ນຊຸດບຳລຸງວິຊາການຄັ້ງທີ 12 ໂດຍກະຊວງຖະແຫຼງຂ່າວ ແລະ ສື່ສານຫວຽດນາມ ສົມທົບກັບ ກະຊວງຖະແຫຼງຂ່າວ ວັດທະນະທຳ ແລະ ທ່ອງທ່ຽວລາວຈັດຕັ້ງຂຶ້ນ ເພື່ອສະຫງວນໃຫ້ບັນດານັກຂ່າວລາວ. ຊຸດບຳລຸງດັ່ງກ່າວແມ່ນເພື່ອແນໃສ່ຊ່ວຍໃຫ້ບັນດານັກຂ່າວລາວ ຈັດຕັ້ງວຽກງານໂຄສະນາບັນດາເຫດການໃຫຍ່ໃນປີ 2016 ໃຫ້ດີກວ່າ. ທ່ານ ວິໄລທອງ ສີຊານົນ, ຫົວຫນ້າສະຖາບັນຖະແຫຼງຂ່າວ - ວັດທະນະທຳ ແລະ ທ່ອງທ່ຽວລາວ (ກະຊວງຖະແຫຼງຂ່າວ - ວັດທະນະທຳ ແລະ ທ່ອງທ່ຽວລາວ) ໃຫ້ຮູ້ວ່າ: ໃນໄລຍະຜ່ານມາ, ກົມສື່ມວນຊົນ - ກະຊວງຖະແຫຼງຂ່າວ ແລະ ສື່ສານຫວຽດນາມ ໄດ້ຈັດຕັ້ງຊຸດບຳລຸງດ້ານວິຊາການຫຼາຍຊຸດ, ດ້ວຍບັນດາຫົວຂໍ້ແຕກຕ່າງກັນ ທີ່ສະຫງວນໃຫ້ນັກຂ່າວລາວ ກວ່າ 400 ຄົນ.
(ທ່ານ ວິໄລທອງ ສີຊານົນ, ຫົວຫນ້າສະຖາບັນສື່ມວນຊົນ
ແລະ ວັດທະນະທຳລາວ)
ທ່ານຜູ້ຟັງທີ່ເຄົາລົບ, ດັ່ງທີ່ກ່າວມາຂ້າງເຖິງແມ່ນເນື້ອໃນຄຳຖາມຂອງຜູ້ຟັງບາງທ່ານທີ່ຝາກມາລາຍການໃນອາທິດຜ່ານມາ, ຫວັງວ່າ ທ່ານຜູ້ຟັງຈະສືບຕໍ່ຝາກຈົດໝາຍ, ອີແມວ ຫຼື ໂທລະສັບມາຫາລາຍການເພື່ອປະກອບຄຳເຫັນຊ່ວຍລາຍການຂອງພວກເຮົາໃຫ້ນັບມື້ນັບດີກວ່າເກົ່າ. ພວກເພື່ອນສາມາດຝາກຈົດໝາຍມາຍັງລາຍການໂດຍຈ່າໜ້າຊອງວ່າ: ພາກພາສາລາວ, ວິທະຍຸກະຈາຍສຽງຫວຽດນາມ, ເຮືອນເລກທີ 45 ຖະໜົນ ບ່າຈ້ຽວ, ຮ່າໂນ້ຍ. ຫຼືໂທລະສັບໂດຍກົງກໍ່ໄດ້ຕາມເບີໂທ 0084.43.8256631 ຫຼື ສົ່ງອີແມວດ້ວຍລະຫັດ laovov@yahoo.com. ຂໍອວຍພອນໃຫ້ທ່ານຈົ່ງມີສຸຂະພາບເຂັ້ມແຂງ ແລະ ມີຄວາມຜາສຸກ.