ໃນອາທິດຜ່ານມາ, ພະແນກກະຈາຍສຽງບັນດາລາຍການພາກພາສາຕ່າງປະເທດ, ວິທະຍຸກະຈາຍສຽງຫວຽດນາມ ໄດ້ຮັບຈົດໝາຍ, ອີເມວ 443 ສະບັບ ແລະ ໂທລະສັບຫຼາຍສາຍ ຈາກທ່ານຜູ້ຟັງທີ່ມາຈາກ 36 ປະເທດ ແລະ ເຂດແຄ້ວນ. ໃນນັ້ນ, ລາຍການພາກພາສາລາວ ໄດ້ຮັບຈົດໝາຍ, ອີເມວ 9 ສະບັບຈາກທ່ານຜູ້ຟັງລາວ.

(ເວັບໄຊພາກພາສາລາວ)

ເພື່ອນ ວົງຄຳ, ຢູ່ແຂວງ ອຸດົມໄຊ ໄດ້ສົ່ງຂໍ້ຄວາມທາງ Facebook ມາຫາລາຍການພາກພາສາລາວ ອວຍພອນບຸນເຕັດປະຈຳຊາດປີສະຫຼູ ຫວຽດນາມ 2021 ແລະ ແບ່ງປັນຄວາມຮູ້ສຶກຂອງຕົນຕໍ່ລາຍການພາກພາສາລາວ, ເພື່ອນໃຫ້ຮູ້ວ່າ “ເນື່ອງໃນໂອກາດບຸນເຕັດປະຈຳຊາດຫວຽດນາມ ປີ 2021, ຂ້າພະເຈົ້າຂໍອວຍພອນໃຫ້ບັນດາການນຳ, ອ້າຍເອື້ອຍນ້ອງຂອງ VOV ປີໃໝ່ຈົ່ງປະສົບຜົນສຳເລັດໃນໜ້າທີ່ວຽກງານຂອງຕົນ, ມີສຸຂະພາບເຂັ້ມແຂງເພື່ອສືບຕໍ່ຮັບໃຊ້ປະຊາຊົນ, ປະເທດຊາດ ແລະ ເພື່ອນມິດສາກົນ”.

ເພື່ອນ ວັນໄຊ ກໍ່ໄດ້ສົ່ງຂໍ້ຄວາມທາງ Facebook ມາຫາລາຍການ ໃຫ້ຮູ້ວ່າ: “ເຖິງວ່າໃນໂອກາດບຸນເຕັດປະຈຳຊາດຫວຽດນາມ ປີ 2021 ສືບຕໍ່ເກີດໂລກລະບາດຄັ້ງໃໝ່, ແຕ່ບັນດາບັນນາທິການທາງລາຍການຍັງມານະພະຍາຍາມອອກຂ່າວ, ບົດມ່ວນໆສົ່ງເຖິງຜູ້ຟັງ. ຂ້າພະເຈົ້າຂໍອວຍພອນໃຫ້ບັນດາອ້າຍເອື້ອຍນ້ອງຂອງ VOV ມີສຸຂະພາບເຂັ້ມແຂງ”.

ສ່ວນເພື່ອນ Jayanta Chakrabarty, ມາຈາກອິນເດຍ ໄດ້ສົ່ງອີເມວມາຫາລາຍການແບ່ງປັນວ່າ: “ຂໍອວຍພອນໃຫ້ພວກເພື່ອນທຸກໆຄົນ ປີໃໝ່ 2021 ມີສຸຂະພາບເຂັ້ມແຂງ, ມີຄວາມວັດທະນາຖາວອນ. ຫວັງວ່າພວກເພື່ອນໄດ້ມີຊ່ວງເວລາພັກຜ່ອນທີ່ອົບອຸ່ນ, ມ່ວນຊື່ນ”.

(ຫໍສະພາແຫ່ງຊາດລາວ)

ໃນໂອກາດບຸນເຕັດວຽນມານັ້ນ, ຜູ້ໃດກໍ່ມີຄວາມກະຕືລືລົ້ນທີ່ໄດ້ກັບເມືອບ້ານເຕົ້າໂຮມພ້ອມກັບຄອບຄົວ. ໃນຕອນເຊົ້າວັນທີ 1 ເດືອນຈຽງ ບຸນເຕັດປີສະຫຼູ (ໄລ່ຕາມຈັນທະປະຕິທິນຫວຽດນາມ), ມີພະນັກງານ, ນັກຮົບ ແລະ ຜູ້ອອກແຮງງານຂອງພົນລະພາກຫຼວງ 11 ພວມກໍ່ສ້າງຫໍສະພາແຫ່ງຊາດລາວ ຍັງເມົາມົວກັບວຽກງານດ້ວຍຈິດໃຈຫ້າວຫັນໃນໂອກາດບຸນເຕັດ. ພາຍຫຼັງການກໍ່ສ້າງມາເປັນເວລາ 3 ປີ, ເຖິງວ່າຈະຖືກຜົນສະທ້ອນຍ້ອນໂລກລະບາດໂຄວິດ-19, ຜູ້ອອກແຮງງານມາຈາກຫວຽດນາມ ແລະ ການຂົນສົ່ງວັດຖຸອຸປະກອນປະສົບກັບຄວາມຫຍຸ້ງຍາກຫຼາຍຢ່າງກໍ່ຕາມ, ແຕ່ບັນດາພະນັກງານ, ນັກຮົບພົນລະພາກຫຼວງ 11 ຍັງໄດ້ຍົກສູງຈິດໃຈຄວາມຕັດສິນໃຈຍູ້ໄວຄວາມຄືບໜ້າໃນການກໍ່ສ້າງ. ມາຮອດປະຈຸບັນ, ກິດຈະກຳໄດ້ສຳເລັດ 95% ປະລິມານໜ້າວຽກແລ້ວ. ເປັນບຸນເຕັດປີທີ 3 ທີ່ບໍ່ໄດ້ກັບເມືອບ້ານ, ພັນຕີ, ນາຍຊ່າງ ດິງງອັກເກືອງ, ຮັບຜິດຊອບພາກສ່ວນໄຟຟ້າຂອງຫໍສະພາແຫ່ງຊາດ, ແບ່ງປັນວ່າ.

“ໃນຊຸມມື້ບຸນເຕັດ, ພວກຂ້າພະເຈົ້າຄິດຮອດຄອບຄົວຫຼາຍ, ແຕ່ທຸກສິ່ງທຸກຢ່າງກໍ່ເພື່ອຈະນຳກິດຈະກຳນີ້ເຂົ້າໃຊ້ການໃຫ້ຖືກຕາມກຳນົດເວລາ. ຂ້າພະເຈົ້າຂໍອວຍພອນໃຫ່້ທຸກຄົນຕ້ອນຮັບບຸນເຕັດຢ່າງເບີກບ່ານມ່ວນຊື່ນ, ລະດົມກຳລັງໃຈເພື່ອໃຫ້ບັນດາອ້າຍນ້ອງມີຄວາມອຸ່ນອ່ຽນໃຈປະຕິບັດວຽກງານ, ສຳເລັດໜ້າທີ່ການງານທີ່ໄດ້ຮັບການມອບໝາຍໃນຊຸມມື້ຕົ້ນປີນີ້ ແລະ ໝັ້ນໝາຍຕໍ່ຄອບຄົວຈະພົບໜ້າພໍຕາໃນບຸນເຕັດປີໜ້າ.”

ພະນັກງານ, ນັກຮົບ, ຜູ້ອອກແຮງງານຂອງພົນລະພາກຫຼວງ 11 ຢູ່ດິນແດນລາວ ນັ້ນ ພ້ອມກັນຮັກສາລະດັບຄວາມຄືບໜ້າ, ປະຕິບັດວຽກງານທີ່ຍັງເຫຼືອໃຫ້ສຳເລັດ, ສູ້ຊົນໃຫ້ມີການມອບຮັບໄລຍະທີ 1 ຂອງກິດຈະກຳ ຮັບໃຊ້ໃຫ້ແກ່ກອງປະຊຸມຄັ້ງປະຖົມມະເລີກສະພາແຫ່ງຊາດລາວ ຊຸດທີ 9, ເຊິ່ງຈະໄຂຂຶ້ນໃນທ້າຍເດືອນ ມີນາ ຈະມາເຖິງນີ້, ເພື່ອໃຫ້ຫໍສະພາແຫ່ງຊາດ ສົມເປັນສັນຍາລັກອັນດີງາມຂອງສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີແບບພິເສດ, ການຮ່ວມມືຮອບດ້ານລະຫວ່າງຫວຽດນາມ - ລາວ, ລາວ - ຫວຽດນາມ.

(ພາບ: hanotour)

ເພື່ອນ ຄຳປະສົງ ໄດ້ສົ່ງຂໍ້ຄວາມຜ່ານທາງ Facebook ມາຍັງລາຍການໂດຍໃຫ້ຮູ້ວ່າ “ຂ້າພະເຈົ້າໄດ້ຮູ້ວ່າ, ແຂວງ ມົກເຈົາ ແມ່ນໜຶ່ງໃນບັນດາສະຖານທີ່ທ່ອງທ່ຽວທີ່ມີຊື່ສຽງຫຼາຍແຫ່ງຢູ່ ຫວຽດນາມ. ຂ້າພະເຈົ້າຢາກຊອກຮູ້ກ່ຽວກັບທຳມະຊາດ, ປະຊາຊົນຢູ່ສະຖານທີ່ທ່ອງທ່ຽວດັ່ງກ່າວ. ຂ້າພະເຈົ້າຄວນໄປທ່ອງທ່ຽວແບບໃດຈຶ່ງເໝາະສົມ?”.

        ເພື່ອນ ຄຳປະສົງ ທີ່ຮັກແພງ, ມົກເຈົາ ປຽບເໝືອນ “ດ່າລາດ” ຂອງເຂດ ໄຕບັ໊ກ (ໝາຍເຖິງທິດຕາເວັນຕົກສ່ຽງເໜືອ), ດ້ວຍອາກາດທີ່ເຢັນສະບາຍຕະຫຼອດປີ, ທິວທັດທຳມະຊາດອັນສວຍງາມ, ບັນດາທົ່ງຫຍ້າ, ໂນນຊາຂຽວສົດງົດງາມຕະຫຼອດປີ. ເຂດທ່ອງທ່ຽວແຫ່ງຊາດ ມົກເຈົາ ລວມມີ 2 ເມືອງ: ມົກເຈົາ ແລະ ເວີນໂຮ່, ເຊິ່ງຫ່າງຈາກນະຄອນຫຼວງຮ່າໂນ້ຍ 200 ກ.ມ. ເຂດທ່ອງທ່ຽວນີ້ມີຫຼາຍຊົນເຜົ່າອ້າຍນ້ອງດຳລົງຊີວິດຢູ່ຮ່ວມກັນ, ແຕ່ລະຊົນເຜົ່າກໍ່ມີຈຸດວັດທະນະທຳທີ່ເປັນເອກະລັກສະເພາະຂອງໃຜມັນ, ມີຄວາມດູດດຶ່ມສະເພາະ. ມີສີສັນວັດທະນະທຳທາງດ້ານຊຸດອາພອນຫຼາກຫຼາຍ, ສະຖາປັດຕະຍາກຳເຮືອນຢູ່, ການດຳເນີນຊີວິດດ້ານວັດທະນະທຳທີ່ເປັນຫຼາຍຮູບຫຼາຍແບບ, ອາຫານການກິນກໍ່ມີຫຼາຍເຍື່ອງ ນັ້ນແມ່ນບັນດາປັດໄຈດຶງດູດນັກທ່ຽວທ່ຽວທັງຢູ່ພາຍໃນ ແລະ ຕ່າງປະເທດ. ຖ້າຫາກເພື່ອນຢາກຊອກຮູ້ກ່ຽວກັບທິວທັດທຳມະຊາດ, ປະຊາຊົນມົກເຈົາ, ເພື່ອນຄວນເລືອກການທ່ອງທ່ຽວແບບ homestay (ພັກຢູ່ເຮືອນປະຊາຊົນ). ເມື່ອເພື່ອນມາພັກຜ່ອນດຳລົງຊີວິດຢູ່ກັບວົງຄະນະຍາດ, ເພື່ອນບໍ່ພຽງແຕ່ມີໂອກາດໄດ້ຮັບປະທານບັນດາເຍື່ອງອາຫານຂອງຊົນເຜົ່າ, ແລກປ່ຽນວັດທະນະທຳ, ສິລະປະເທົ່ານັ້ນ, ຫາກຍັງໄດ້ຄົ້ນຫາທິວທັດທຳມະຊາດແບບປະຖົມປະຖານ, ຫົກເຮື້ອເປົ່າຫວ່າງ, ສວຍງາມ; ໄດ້ຊອກຮູ້ກ່ຽວກັບຮີດຄອງປະເພນີ, ສີສັນວັດທະນະທຳຂອງຊົນເຜົ່າ ແລະ ໄດ້ເຂົ້າຮ່ວມການລະຫຼີ້ນພື້ນເມືອງ, ອາຊີບຫັດຖະກຳ, ເຂົ້າຮ່ວມການເຄື່ອນໄຫວອອກແຮງງານທຳການຜະລິດກັບພໍ່ແມ່ປະຊາຊົນຢູ່ທີ່ນີ້ອີກດ້ວຍ. ຫວັງວ່າ, ຮູບແບບທ່ອງທ່ຽວ homestay ເຊິ່ງທາງລາຍການແນະນຳມານັ້ນຈະຊ່ວຍໃຫ້ເພື່ອນມີເວລາພັກຜ່ອນທີ່ເບີກບານມ່ວນຊື່ນ ແລະ ມີຄວາມໝາຍຢູ່ຫວຽດນາມ.