ເສົາຫຼັກໝາຍຢູ່ຈຸດຊາຍແດນລະຫວ່າງຫວຽດນາມ-ລາວ-ກຳປູເຈຍ |
ເສົາຫຼັກໝາຍຢູ່ຈຸດຊາຍແດນລະຫວ່າງຫວຽດນາມ ລາວ ກຳປູເຈຍ ໄດ້ຮັບການເລີ່ມລົງມືກໍ່ສ້າງເມື່ອວັນທີ 29 ພະຈິກ ປີ 2007 ແລະ ໄດ້ສຳເລັດການກໍ່ສ້າງເມື່ອວັນທີ 18 ມັງກອນ ປີ 2008. ເສົາຫຼັກໝາຍນີ້ຖືກຕັ້ງເທິງຈອມພູທີ່ມີຄວາມສູງກວ່າ 1.000 ແມັດ, ຝ່າຍ ຫວຽດນາມ ແມ່ນຂຶ້ນກັບຕາແສງ ເບີ່ອີ, ເມືອງ ງັອກໂຮ່ຍ ແຂວງ ກອນຕູມ; ທາງຝ່າຍລາວແມ່ນແຂວງ ອັດຕະປື ທາງຝ່າຍ ກຳປູເຈຍ ແມ່ນແຂວງ ຣັດຕະນາກີຣີ. ນັບແຕ່ເມື່ອສຳເລັດການກໍ່ສ້າງ, ຕະຫຼອດ 12 ປີທີ່ຜ່ານມາ ເສົາຫຼັກໝາຍຢູ່ຈຸດຊາຍແດນລະຫວ່າງສາມປະເທດ ແມ່ນສະຖານທີ່ ເພື່ອໃຫ້ປະຊາຊົນໃນທົ່ວປະເທດ ແລະ ນັກທ່ອງທ່ຽວສາກົນມາຢ້ຽມຊົມ ທັດສະນະສຶກສາ. ອ້າຍ ດ່ຽວເລນາມ, ພະນັກງານສັງກັດສະຫະພັນຊາວໜຸ່ມ ຫວຽດນາມ ແຂວງ ດັກນົງ ແບ່ງປັນວ່າ:
“ເປັນຄັ້ງທຳອິດທີ່ໄດ້ມານີ້, ນ້ອງຮູ້ສຶກມີຄວາມເອກອ້າງທະນົງໃຈທີ່ສຸດ, ນ້ອງຂອບໃຈລຸ້ນປູ່ລຸ້ນອ້າຍ ທີ່ໄດ້ເສຍສະຫຼະເລືອດເນື້ອ ເພື່ອປົກປັກຮັກສາເອກະລາດ ອະທິປະໄຕ ກໍ່ຄືຊາຍແດນ, ຜືນແຜ່ນດິນຂອງປະເທດຊາດ”.
ຈາກດ່ານຊາຍແດນສາກົນ ເບີ່ອີ, ພວກເຮົາຕ້ອງຜ່ານໄລຍະທາງປະມານ 10 ກິໂລແມັດໃນທ່າມກາງເຂດພູຜາປ່າໄມ້ທີ່ໃຫຍ່ໂຕມະໂຫຖານ ກໍ່ຈະຮອດເສົາຫຼັກໝາຍຢູ່ຈຸດຊາຍແດນລະຫວ່າງສາມປະເທດ. ແຂວງ ກອນຕູມ ກໍ່ໄດ້ກໍ່ສ້າງສະຖານທີ່ຈອດລົດຢູ່ຕີນພູ ເຊິ່ງແມ່ນແຫ່ງກໍ່ສ້າງເສົາຫຼັກໝາຍ, ສຳລັບຂັ້ນໄດຂຶ້ນເສົາຫຼັກໝາຍກໍ່ຖືກຕິດກະໂຣຫີນທີ່ສະອາດງາມຕາ. ລຸງ ໂດ໊ຈ້ອງຄວາ ອາຍຸ 77 ປີ ອະດີດຜູ້ອຳນວຍການຫໍພິພິທະພັນປ້ອງກັນຊາຍແດນນະຄອນຫຼວງ ຮ່າໂນ້ຍ ໄດ້ມາຢ້ຽມຢາມເສົາຫຼັກໝາຍເປັນຄັ້ງທີ່ສາມແລ້ວ ໄດ້ເວົ້າດ້ວຍຄວາມຕື້ນຕັນໃຈວ່າ:
“ຂ້າພະເຈົ້າໄດ້ມານີ້ ຢ້ຽມຢາມສະໜາມຮົບເກົ່າ. ໄດ້ພົບໝູ່ເພື່ອນຮ່ວມກົມກອງ ຢູ່ກົມກອງກຳລັງປ້ອງກັນຊາຍແດນແຂວງ ກອນຕູມ ກໍ່ຮູ້ສຶກຕື້ນຕັນໃຈທີ່ສຸດ. ພິເສດແມ່ນໄດ້ຂຶ້ນຢ້ຽມຊົມເສົາຫຼັກໝາຍ ຢູ່ຈຸດຊາຍແດນລະຫວ່າງສາມປະເທດ, ໄດ້ເຫັນເສົາຫຼັກໝາຍຢັ້ງຢືນອະທິປະໄຕຂອງປະເທດຊາດ, ຂ້າພະເຈົ້າກໍ່ຍິ່ງມີຄວາມຮູ້ສຶກຕື້ນຕັນໃຈ”.
ດ້ວຍທີ່ຕັ້ງພູມສາດເປັນພິເສດ ແລະ ແມ່ນສັນຍາລັກແຫ່ງຄວາມໄວ້ເນື້ອເຊື່ອໃຈ ສາມັກຄີ, ໃນຊຸມປີທີ່ຜ່ານມາ, ເສົາຫຼັກໝາຍຢູ່ຈຸດຊາຍແດນລະຫວ່າງສາມປະເທດທີ່ຕາແສງ ເບີ່ອີ, ເມືອງ ງັອກໂຮ່ຍ ແຂວງ ກອນຕູມ ໄດ້ກາຍເປັນສະຖານທີ່ພົ້ນເດັ່ນໃນບັນດາການເຄື່ອນໄຫວ ກັບຄືນສູ່ກົກເຄົ້າເຫງົ້າກໍ; ແມ່ນບ່ອນຈັດການພົບປະແລກປ່ຽນ ໃນຂອບເຂດການເຄື່ອນໄຫວພົວພັນປະຊາຊົນ, ການພົວພັນດ້ານປ້ອງກັນຊາຍແດນກັບຕ່າງປະເທດ; ໃນການສ້າງເຂດຊາຍແດນແຫ່ງສັນຕິພາບ ມິດຕະພາບ ຂອງກຳລັງສະເພາະກິດແຂວງ ກອນຕູມ ຫວຽດນາມ, ອັດຕະປື ຂອງ ລາວ ແລະ ຣັດຕະນະກີຣີ ຂອງ ກຳປູເຈຍ. ທ່ານ ພັນເອກ ຟ້າມງັອກຝູ໊ ຫົວໜ້າບັນຊາການກຳລັງທະຫານປ້ອງກັນຊາຍແດນ ແຂວງ ກອນຕູມ ໃຫ້ຮູ້ວ່າ:
“ທະຫານປ້ອງກັນຊາຍແດນຍາມໃດກໍ່ເລັ່ງໃສ່ການຍູ້ແຮງ ແລະ ຍົກສູງຄຸນນະພາບ ປະສິດທິຜົນວຽກງານພົວພັນດ້ານປ້ອງກັນຊາຍແດນກັບຕ່າງປະເທດ. ລະອຽດແມ່ນຈັດຕັ້ງການພົບປະແລກປ່ຽນ ເຈລະຈາ ຂັ້ນຕ່າງໆ ເປັນປະຈຳໄລຍະ ແນໃສ່ເພີ່ມທະວີຄວາມເຂົ້າອົກເຂົ້າໃຈ ແລະ ຄວາມໄວ້ເນື້ອເຊື່ອຍໃຈ ແລະ ຍົກສູງປະສິດທິຜົນ ໃນການສົມທົບປະຕິບັດໜ້າທີ່ວຽກງານ. ເປັນເສນາທິການໃຫ້ແກ່ທ້ອງຖິ່ນ ຈັດຕັ້ງການຜູກສ່ຽວລະຫວ່າງບ້ານຕໍ່ບ້ານ ຢູ່ສອງຟາກຊາຍແດນ ແນໃສ່ເພີ່ມທະວີສາຍພົວພັນ ແລະ ຄວາມເຂົ້າອົກເຂົ້າໃຈກັນ. ຕັ້ງໜ້າຊ່ວຍເຫຼືອປະຊາຊົນ, ຄະນະພັກ ອຳນາດການປົກຄອງ ແລະ ກຳລັງປ້ອງກັນຊາຍແດນຂອງປະເທດເພື່ອນບ້ານດ້ວຍທິດນຳ “ຊ່ວຍເພື່ອນແມ່ນຊ່ວຍຕົນເອງ” ປະກອບສ່ວນປັບປຸງເພີ່ມທະວີສາຍພົວພັນສາມັກຄີຢ່າງສະໜິດຕິດພັນ ລະຫວ່າງສອງຟາກຊາຍແດນ”.
ໃນຊຸມເດືອນຕົ້ນປີນີ້, ເສົາຫຼັກໝາຍຢູ່ຈຸດຊາຍແດນລະຫວ່າງສາມປະເທດ ໄດ້ຕ້ອນຮັບແຂກທ່ອງທ່ຽວທັງຢູ່ພາຍໃນ ແລະ ຕ່າງປະເທດຫຼາຍຄະນະມາຢ້ຽມຊົມ ທັດສະນະສຶກສາ. ດ້ວຍໜ້າທີ່ຄວາມຮັບຜິດຊອບທີ່ສັກກາລະບູຊາ ເຊິ່ງປະເທດຊາດ ແລະ ປະຊາຊົນໄດ້ມອບໝາຍໃຫ້, ກຳລັງປ້ອງກັນຊາຍແດນຊາຍແດນແຂວງ ກອນຕູມ ພວມປົກປັກຮັກສາ, ກໍ່ສ້າງເສົາຫຼັກໝາຍຢູ່ຈຸດຊາຍແດນລະຫວ່າງສາມປະເທດ ໃຫ້ກາຍເປັນສັນຍາລັກແຫ່ງຄວາມໄວ້ເນື້ອເຊື່ອໃຈ, ສັນຕິພາບ, ມິດຕະພາບ ແລະ ສາມັກຄີຂອງສາມປະເທດ ຫວຽດນາມ ລາວ ກຳປູເຈຍ ເພື່ອພ້ອມກັນພັດທະນາ.