ອາເມລິກາ ແມ່ນປະເທດທີ່ເປັນໜ້າເປັນຫ່ວງກັງວົນຕໍ່ໂລກລະບາດໂຄວິດ - 19 ທີ່ສຸດ ຂະນະທີ່ໃນຮອບເວລາ 24 ຊົ່ວໂມງທີ່ຜ່ານມາ ໄດ້ມີຜູ້ຕິດເຊື້ອໃໝ່ຕື່ມອີກ 66.000 ຄົນ, ອັນໄດ້ຍົກຍອດຈຳນວນຜູ້ຕິດເຊື້ອຢູ່ປະເທດນີ້ຂຶ້ນເຖິງ 3,2 ລ້ານຄົນ. ຖັດຈາກ ອາເມລິກາ ແມ່ນ ບຣາຊີນ, ອິນເດຍ ແລະ ລັດເຊຍ.

        ໃນສະພາບການໂລກລະບາດຍັງບໍ່ທັນມີສັນຍານຫຼຸດຜ່ອນລົງ, ວັນທີ 12 ກໍລະກົດ, ທ່ານປະທານາທິບໍດີ ອາເມລິກາ Donald Trump ເປັນຄັ້ງທຳອິດໄດ້ປະກົດຕົວຕໍ່ໜ້າມວນຊົນດ້ວຍການໃສ່ຜ້າອັດປາກ - ດັງ ໃນການລົງໄປຢ້ຽມຢາມໂຮງໝໍເສນາຮັກ Walter Reed ຢູ່ຊານນະຄອນຫຼວງວໍຊີງຕັນ ເພື່ອພົບປະກັບບັນດາທະຫານຜ່ານເສິກ ທີ່ພວມປິ່ນປົວຢູ່ທີ່ນີ້. ກ່າວຄຳເຫັນເມື່ອອອກຈາກທຳນຽບຂາວ, ທ່ານ Donald Trump  ຖືວ່າ ການໃສ່ຜ້າອັດປາກ - ດັງ ແມ່ນວິທີດີທີ່ສຸດ ແລະ ເໝາະສົມທີ່ສຸດ.

ກ່ຽວຂ້ອງເຖິງ ໂລກລະບາດໂຄວິດ - 19 ຍັງມີຂ່າວໃຫ້ຮູ້ວ່າ ວັນທີ 11 ກໍລະກົດ, ທ່ານ Kirill Dmitriev ຜູ້ອຳນວຍການບໍລິຫານກອງທຶນລັດເຊຍ (RDIF) ໃຫ້ຮູ້ວ່າ ຢາ Avifavir ປິ່ນປົວໂຄວິດ - 19 ໂດຍລັດເຊຍ ຜະລິດ ໄດ້ຮັບໃບສັ່ງຊື້ຈາກຫຼາຍກວ່າ 50 ປະເທດໃນໂລກ. ບຣາຊິນ ແລະ ບັນດາປະເທດ ອາເມລິກາ ລາຕິນອື່ນໆ ທີ່ມີອັດຕາຜູ້ຕິດເຊື້ອສູງ ຈະແມ່ນບັນດາປະເທດຮັບບຸລິມະສິດ. ຢາ Avifavir ແມ່ນຢາປິ່ນປົວພະຍາດໂຄວິດ - 19 ປະເພດທຳອິດຂອງ ລັດເຊຍ ໄດ້ຮັບອະນຸຍາດຈາກກະຊວງສາທາລະນະສຸກ ຂອງລັດເຊຍ ໃນທ້າຍເດືອນພຶດສະພາທີ່ຜ່ານມາ.