ທ່ານລັດຖະມົນຕີກະຊວງສຶກສາ ແລະ ບໍາລຸງສ້າງ ຫວຽດນາມ ຟຸ່ງຊວັນຫຍະ ໃຫ້ການຕ້ອນຮັບ ທ່ານ ເອກອັກຄະລັດຖະທູດຜູ້ມີອໍານາດເຕັມ ແຫ່ງ ສປປ.ລາວ ປະຈໍາ ຫວຽດນາມ ທອງສະຫວັນ ພົມວິຫານ
|
ທີ່ການຕ້ອນຮັບ, ທ່ານລັດຖະມົນຕີ ຟຸ່ງຊວັນຫຍະ ຕີລາຄາສູງບັນດາການປະກອບສ່ວນຂອງທ່ານເອກອັກຄະລັດຖະທູດ ໃນການປະກອບສ່ວນເຮັດໃຫ້ການພົວພັນມິດຕະພາບ, ຄວາມສາມັກຄີແບບພິເສດ ແລະ ການຮ່ວມມືຮອບດ້ານລະຫວ່າງສອງປະເທດເວົ້າລວມ, ລະຫວ່າງກະຊວງສຶຶກສາ ແລະ ບໍາລຸງສ້າງ ຫວຽດນາມ ແລະ ກະຊວງສຶກສາທິການ ແລະ ກິລາ ລາວ ເວົ້າສະເພາະ.
ທ່ານລັດຖະມົນຕີ ຟຸ່ງຊວັນຫຍະ ໃຫ້ຮູ້ວ່າ ຫວຽດນາມພວມຜັນຂະຫຍາຍແຜນຮ່າງ “ທົດລອງການສອນພາສາຫວຽດ - ລາວ ຢູ່ໂຮງຮຽນ ຫງວຽນຢູ , ວຽງຈັນ, ລາວ” ແລະ ໂຄງການ “ເພີ່ມທະວີກຳລັງຄວາມສາມາດໃຫ້ແກ່ຖັນແຖວພະນັກງານປະຕິບັດວຽກງານສອບເສັງ ແລະ ກວດກາຢັ້ງຢືນຄຸນນະພາບຂອງ ກະຊວງສຶກສາທິການ ແລະ ກິລາລາວ ໄລຍະ 2014 – 2020”. ຜັນຂະຫຍາຍແຜນຮ່າງ “ຮຽບຮຽງຫຼັກສູດສອນພາສາຫວຽດ ແລະ ຊຸດຕໍາລາຮຽນພາສາຫວຽດ (ສະບັບທົດລອງ) ແຕ່ ປ1 ຫາ ມ7 ໃຫ້ແກ່ນັກຮຽນລາວ. ທ່ານລັດຖະມົນຕີ ຟຸຸ່ງຊວັນຫຍະ ປາດຖະໜາວ່າ ຝ່າຍລາວ ຈະມີບັນດາຂໍ້ກໍານົດລະອຽດກວ່າອີກໃນການເລືອກຮັບນັກສຶກສາ ສໍາລັບນັກສຶກສານອກແຜນ ພິເສດແມ່ນຮັບປະກັນລະດັບຄວາມຮູ້ດ້ານພາສາຫວຽດ.
ສ່ວນທ່ານເອກອັກຄະລັດຖະທູດ ທອງສະຫວັນ ພົມວິຫານ ໃຫ້ຮູ້ວ່າ ເມື່ອກັບເມືອປະເທດ ແລະ ຮັບດໍາລົງຕໍາແໜ່ງໃໝ່ ທ່ານຈະສືບຕໍ່ເອົາໃຈໃສ່ເຖິງການຊຸກຍູ້ການຮ່ວມມືລະຫວ່າງສອງປະເທດເວົ້າລວມ, ລະຫວ່າງກະຊວງສຶກສາ ແລະ ບໍາລຸງສ້າງສອງປະເທດເວົ້າສະເພາະ ເພື່ອແນໃສ່ຮັດແໜ້ນສາຍພົວພັນລະຫວ່າງສອງປະເທດໃນຂົງເຂດສຶກສາບໍາລຸງສ້າງຕື່ມອີກ.