ຕອນເຊົ້າວັນທີ 15 ພະຈິກ, ຢູ່ຮ່າໂນ້ຍ, ສະຖາບັນຍຸດທະສາດ, ນະໂຍບາຍຊັບພະຍາກອນທຳມະຊາດ ແລະ ສິ່ງແວດລ້ອມ ໄດ້ຈັດກອງປະຊຸມສຳມະນາປຶກສາຫາລືກ່ຽວກັບບົດລາຍງານຕີລາຄາໝາກຜົນການປະຕິບັດຍຸດທະສາດປົກປັກຮັກສາສິ່ງແວດລ້ອມແຫ່ງຊາດຮອດປີ 2020 ແລະ ໂຄງຮ່າງຍຸດທະສາດໄລຍະ 2021 – 2030.

        ກະຊວງຊັບພະຍາກອນທຳມະຊາດ ແລະ ສິ່ງແວດລ້ອມຫວຽດນາມ ໄດ້ມອບໝາຍໃຫ້ສະຖາບັນຍຸດທະສາດ, ນະໂຍບາຍຊັບພະຍາກອນທຳມະຊາດ ແລະ ສິ່ງແວດລ້ອມ ປະຕິບັດໂຄງການ “ສຳຫຼວດ, ຕີລາຄາໝາກຜົນການປະຕິບັດຍຸດທະສາດປົກປັກຮັກສາສິ່ງແວດລ້ອມແຫ່ງຊາດຮອດປີ 2020, ວິໄສທັດຮອດປີ 2030 ແລະ ສ້າງຍຸດທະສາດປົກປັກຮັກສາສິ່ງແວດລ້ອມແຫ່ງຊາດຮອດປີ 2030, ວິໄສທັດຮອດປີ 2040”.

        ບັນດາບົດປະກອບຄວາມເຫັນທີ່ກອງປະຊຸມສຳມະນາໄດ້ເຕື້ອງເຖິງບັນຫາ: ສະກັດກັ້ນ, ຄວບຄຸມມົນລະພິດສິ່ງແວດລ້ອມ; ການຂຸດຄົ້ນ, ນຳໃຊ້ບັນດາແຫຼ່ງຊັບພະຍາກອນທຳມະຊາດແບບຍືນຍົງ; ອະນຸລັກທຳມະຊາດ ແລະ ຊີວະນາໆພັນ… ທ່ານ ຫວໍຕ໊ວນເຍິນ, ຮອງລັດຖະມົນຕີກະຊວງຊັບພະຍາກອນທຳມະຊາດ ແລະ ສິ່ງແວດລ້ອມຫວຽດນາມ, ເນັ້ນໜັກວ່າ.

        “ຂ້າພະເຈົ້າຖືວ່າ, ເສດຖະກິດ, ສັງຄົມ ແລະ ສິ່ງແວດລ້ອມແມ່ນ 3 ເສົ້າຄ້ຳໃຫ້ແກ່ການພັດທະນາແບບຍືນຍົງ. ຫວ່າງມໍ່ໆມານີ້, ມີນັກວິທະຍາສາດຫຼາຍທ່ານກໍ່ຖືວ່າ ເສດຖະກິດ, ສັງຄົມ ແລະ ສິ່ງແວດລ້ອມແມ່ນ 3 ໜ້າທີ່ຈຸດສຸມ. ນີ້ແມ່ນແນວຄວາມຄິດໃໝ່ເພື່ອຮັບປະກັນໃຫ້ແກ່ການພັດທະນາແບບຍືນຍົງ. ແຫຼ່ງກຳລັງດ້ານການເງິນທີ່ສະຫງວນໃຫ້ແກ່ການປົກປັກຮັກສາສິ່ງແວດລ້ອມຕ້ອງໄດ້ເອົາໃຈໃສ່ຫຼາຍກວ່າ, ຍູ້ແຮງການຫັນເປັນສັງຄົມ, ວິສາຫະກິດ ພ້ອມກັບປະຊາຊົນປະຕິບັດການປົກປັກຮັກສາສິ່ງແວດລ້ອມ ເພື່ອສ້າງບາດກ້າວບຸກທະລຸໃນການປົກປັກຮັກສາສິ່ງແວດລ້ອມ”.