ວັນທີ 24 ກັນຍາ, ການນຳບັນດາປະເທດ ກຸ່ມ QUAD ເຊິ່ງລວມມີ ອາເມລິກາ, ຍີ່ປຸ່ນ, ອິນເດຍ ແລະ ອົດສະຕາລີ ໄດ້ໄຂກອງປະຊຸມສຸດຍອດຢູ່ນະຄອນຫຼວງ ວໍຊິງຕັນ, ອາເມລິກາ ດ້ວຍຄຳໝັ້ນສັນຍາສາມັກຄີ ແລະ ຮ່ວມມື, ຊຸດຍຸ້ການສະໜອງວັກຊິນກັນພະຍາດໂຄວິດ - 19, ພື້ນຖານໂຄງລ່າງ ແລະ ເຕັກໂນໂລຢີປ້ອງກັນ, ຕ້ານໂລກລະບາດ ໂຄວິດ - 19.
ທ່ານນາຍົກລັດຖະມົນຕີ ອົດສະຕາລີ Scott Morrison ໄດ້ເນັ້ນໜັກເຖິງຄວາມສຳຄັນຂອງພາກພື້ນມະຫາສະໝຸດ ອິນເດຍ - ປາຊີຟິກ ເສລີ ແລະ ເປີດກວ້າງ ໃນຂະນະທີ່ທ່ານນາຍົກລັດຖະມົນຕີ ອິນເດຍ Narendra Modi ຮຽກຮ້ອງໃຫ້ສ້າງສັນຕິພາບ ຢູ່ມະຫາສະໝຸດອິນເດຍ - ປາຊີຟິກ. ກຸ່ມ QUAD ຄາດວ່າ ຈະປະກາດຂໍ້ຕົກລົງບາງສະບັບແນໃສ່ ຈີນ ໂດຍກົງ, ລວມມີ ຂໍ້ຕົກລົງ ເພີ່ມທະວີຄວາມໝັ້ນຄົງຂອງລະບົບສະໜອງທາດເຄິ່ງຊັກນຳໄຟຟ້າ ແລະ ຕ້ານການຈັບຫາປາຢ່າງຜິດກົດໝາຍ ແລະ ຍົກສູງສະຕິຄວາມຮັບຮູ້ກ່ຽວກັບຂົງເຂດການບິນ. ສະຫະພັນດັ່ງກ່າວ ກໍຈະຜັນຂະຫຍາຍອິນເຕີເນັດ 5G ແລະ ບັນດາແຜນການຕິດຕາມກວດກາການປ່ຽນແປງຂອງດິນຟ້າອາກາດ.